Di baskan ra Rayraşîyayîşê Azadîye yo Pîl seba azadîya Rayberê Şarê Kurdî Abdullah Ocalanî û çareserîya meseleya kurdan dewam keno.

Roja 7ine de baska Qersî resaye qezaya Kanîreşî ya Çewlîgî. Dekewtişê qeza de şarî raywanî pêşwazî kerdî û dima girseyî reyde bi sloganê "Bijî berxwedana İmraliyê" ver bi merkezê qeza rayraşîyayîş kerd.

Rayraşîyayîşî ra dima Wekîlê DEM Partî Omer Ocalanî qisey kerd û vat: ''Ez Mehmet Karasungur, Mazlûm Dogan û Hayrî Durmuşî bi rêzî yad kena ke înan seba azadîye bedel dabi. Tornê înan rêçê înan de şinê. Ma seba azadîya Birêz Abdullah Ocalanî, azadîya welat û şarê xo rayîr a şinê. Ma wazenê Birêz Ocalan keye û avûkatanê xo bivîno û meseleya kurdan çareser biba. Waştişê ma meşrû heqdar ê. Ma do seba heqanê xo tim têkoşîn bikerê.''

Dima girse qewexaneyêk de şarî reyde ronişt. Tîya de notanê pêvînayîşî yê Rayberê Şarê Kurdî Ocalanî ra tay pasajî ameyî wendene.

Raywananê Azadîye dima ra mezelê kadroyanê serkêşan ê PKKyî ra Hayrî Dumurşî zîyaret kerd. Çalakîwanê ke bi vilikan ameyî mezelan bi slogana “Şehid namirin” semedê şehîdan rêz girewt. Parlamenterê DEM Partî Omer Faruk Hulaku yê ke tîya qisey kerd, vat: ''Nika her hetê welatî açarîyayo Zîndanê Amedî. Wa bizanê ke eke Esat Oktayî est ê, vera înan Mazlûm û Harîyî zî est ê. Hayrî Dumuşî vat bi 'Eke ez bimirî mezelê mi ser o deyndarê şarê xo yo binusê. ' O ma rê deydanr nîyo, ma deyndarê ey yê. Ma zî do bi têkoşînê xo wayîrê ey bivejîyê.''

Pawitişê Hayrî Durmuşî yê mehkeme ra zî qismêk ame wendene. Serê mezelê Durmuşî de vilîkî ameyî ronayene û dima mezelê şehîdanê bînan ameyî zîyaretkerdene.

Kanîreşî ra dima girse do verê xo bido qezaya Depe ya Xarpêtî.