Rewşa Îstîsnayî ya ke Hukmatê AKP-MHP‘yî 2016 de îlan kerdîbî bi tayînkerdişê qeyûman ê şaredarîyanê Amed, Wan û Mêrdînî bîye hertimî.

Wano ke tede demokrasî û huquk bin ra ameyo wedaritene de îlankerdişê Rewşa Îstîsnayî 20‘ê Temuze 2016‘î ra nata no 1031 rojî yo ke qedexeyê çalakî û programan esto. Wan û qezayanê ci de no di serrî yo îzahat û mîtîngî qedexe yê. Mayî, HDP‘yî, wekîl, weçînitoxî û şar derbe wenê û yenê girewtene.

Hukmatî her çiqas rewşa îstîsnayî wedarita zî bi kerdişanê îdareyê şîdinayî rewşa îstîsnayî dewam kena. Derbeya qeyûmî ya Şaredarîya Pîle ya Wanî ra dima her roj erzenê keyeyan ser, merdiman gênê binê nezaretî û her ke şonê kontrolê rayîran zêdîyenê. Wan de 8 aşmanê 2019‘î de eşto 400 keyeyan ser, heta nika 300 kesî ameyê girewtene binê nezaretî. 15 hezar rey Wan û qezayanê ci de nasnameyî ameyê kontrolkerdene.

Dormeyê Şaristanî Ameyo Çarnayene

Darbeya qeyûmî yê 19‘ê Tebaxe ra dima dormeyê şaristanî ameyo girewtene, mîyanê Colemêrg, Wan, Agirî, Bedlîs û Îdirî de her kîlometreyekê de reyî kontrol yeno kerdene. AKP yo ke pê ver nêna ke mîyanê şaristanan de cayê kontrolkerdişî nayê ro, mîyanê qezayan û dewan de zî cayanê kontrolî nano ro. Cayanê kontrolî ra serkewte rayîran ser o bi seyan wesayîtî kewenê rêze, bi seatan hemwelatî keyfî ênê vindarnayene.

Bi Qeyûman Zext Zêddyayo

Mabênê merkezê Wanî û qezayan de kontrolkerdişê nasnameyan bîyo îşkence. Demê kontrolanê rayîran de her roj keyfî ramitoxan rê ceza êna birnayene. Ramitoxî wexto ke vera vindenê zî ramitox û raywanî ênê girewtene binê nezaretî. Raywaneko ke şono Wan-Çaldiran û Bazîdî ke seba emnîyetê xo nameyê xo nêvat vat ke mabênê Wan û Bazîdî di seatî yo la kontrolî ra serkewte bîyo 6 seatî.