Rêxistinê Ciwanîye yê Dêrsimî semedê avûkate Ebru Tîmtîka ke semedê hukmkerdişê edîlî  roja 238. ya çalakîya rojeyê mergî de dinyaya xo bedilnaye de eşkerayîya çapemenîye daye.

Çalakîya ke Kuçeyê Sanatî ameye kerdene xeylêk temsîlkarê rêxistin, sendîka û partîyanê sîyasîyan û hemwelatîyî tewrê ci bîyî. Çalakî de pankarta ''Avûkatê ke xo ver danê do ser bikewê, Ebru Tîmtîk bêmerg a'' ameye akerdene. Bi nameyê Rêxistinanê Ciwanîyê yê Dêrsimî Mehmet Saglanî eşkerayî wende.

Ma do semedê waştişê cinîya delale ya Dêrsimî têkoşîn bikerê

Saglanî bale ante bêhuqûqîya prosesî ser o û vat: ''Cinîya delale ya Dêrsimî Ebru Tîmtîka bîlasebeb ameyêne tepiştene bi xoverdayîşê rojeyê mergî semedê edalet û hukmkerdişê edîlî qîraye û semedî ra şehîde bîye. Ebru û Aytaç 5ê çeleyî ra bi îfadeyanê şahîdanê nimiteyan bîlasebeb yenê hukmkerdene. Dewleta ke bawerî û qerardarîya înan nêeşkaye bişikne, goş nêda waştişê edaletî yê înan ser û bi polîtîkaya qirkerdişî sey Helîne Ebru zî qetil kerd. Bi na polîtîka wazenê ke verê têkoşînê edaletî bigerê la waştişê edaletî yê Ebru ma rê wasîyet o. Ma semedê caardişê waştişê edaletî yê Ebru ewro tîya ra qîrenê û do qîrayîşî rê dewam bikerê. Seba ke wa Aytaç zî qetil mekerê, ma pêro pîya veng danê. Ma do sozê edaletî ke dayo Ebru bîyarê ca.''

Îradeyo ke tecawuzkar  vera da, waştişê tasêkê awa Munzurî yê Tîmtîke nêard ca

Reyna Heyetê Îdareyê yê Baroyê Dêrsimî zî bi eşkerayîya nuştekîye Ebru Tîmtîke arde vîrardene. Eşkerayî de wina ame vatene:  ''Îradeyo ke tecawuzkar Musa Orhan vera da, waştişê tasêkê awa Munzurî yê Tîmtîke nêard ca. Ebru Tîmtîk têna hukmkerdişo edlî waştêne û semedê naye heta hela peyêne têkoşîn kerd. Ma do aye çirey xo vîrî ra mekerê û tim bi hurmet yad bikerê.''