Odaya Tabîban a Amedî, Odaya Yewîye ya Muhendîs û Mîmaran (TMMOB) ya Amedî, Temsîlkarîya Weqfa Heqanê Merdiman a Tirkîya (TÎHV), Konfederasyonê Sendîkayanê Kedkaran ê Umûmîye (KESK) yê Amedî, Komeleya Huqûqnasan a Seba Azadîye (OHD), Konfederasyonê Sendîkayanê Karkeran ê Şorişgêran (DÎSK) yê Amedî, Şubeyê Amedî yê ÎHDyî û Komeleya Cinîyan a Rosa derheqê rojnamegeranê ke 8ê hezîrane de ameybî destbendkerdene de eşkerayîyê daye.

Eşkerayîye de ame vîrvistene ke rojnamegerî 6 rojî yo nezaret de yê, derheqê dosya de agahîye nêdîyena avûkatan û wextê înan ê nezaretî heta 16ê hezîrane ame dergkerdene. Eşkerayîye de ame parekerdene ke na polîtîkaya sûcdarkerdiş û bêîtîbarkerdişî verî ra nata vera rojnamegeranê kurdan yena caardene.

Eşkerayîye de ame waştene ke wa rojnamegerî cade bêrê veradayene. Rêxistinan vat: ''Destbendkerdişê nê rojnamegeran keyfî yo, huqûqî nîyo. Ma venga selahîyetdaran danê ke hînî rojnamegeran hedef mekerê, ma venga rêxistinanê komelê sivîlî û dezgehanê medya yê Tirkîya zî danê ke bi xurtî paştî bidê rojnamegeranê kurdan.''