Hêrişê îşxalî yê dewleta tirke yê vera Hêremanê Pawitişî yê Medya, çar parçeyanê û koyanê Kurdîstanî de dewam keno. Şarê kurdo ke vera hêrişê îşxalî yê vera Zap û Avaşînî hêrsbîyaye yo pê çalakîyan nêrazîbîyayîşî moneno.  Hetê bînî ra ciwanî zî hem çalakîyan kenê heme zî verê xo danê sefanê gerîlayan. Bitaybetê badê eşkerayîyanê PKK û PAJKî ciwanê kurdan verê xo danê sefanê gerîlayan. Tewr peynî de Rojawan ra grûbêka cinîyan ê ciwanan da pêhesnayene ke ê tewrê sefana gerîyan bîyî. Ciwanan eşkerayîyêke daye û nê vatî:

''Tecrîdo giran ê vera Rayberê Şaran Rayber Apoyî hema dewam keno. Ma nê sey parçeyê tewr pîlî yê Şerê Dinya yê Hîrêyînî hesibnenê. Seba ke Rayber Apo seserra 21. de heme merdimîye temsîl keno hêzanê hegemonîkan waşt şexsê ey de komelê demokratîkî çîn bikerê. Hêrişê îşxalî yê vera Kurdîstanî zî dewamê polîtîkaya Îmraliyî yo. Seba ke PKK werte ra bêro wedaritene sere de dewleta tirke û PDK hêzanê îşxalkeran hêzê xo kerdo yew. Wazenê ke kurdan biqedinê, her çîyê kurdan werte ra wedarê. Coka heme hêzê xo semedê nê şerî xerc kenê. Ma zî seba ke polîtîkayanê înan pûç vejê ma têkoşînê  xo bi gerîlayan kenê yew.

 PDK sey hetkarê hêzanê faşîsan rolo aktîf kay keno ke îşxalkerî dormeyê gerîlayan bîgêrê. Wa mero vîrakerdene ke dewleta tirke û heme hêzê ke peyê ci de PDKyî têna semedê menfeatê xo yê îşxalî şuxulnenê. Ma do çirey nê kerdişanê PDKyî xo vîr a mekerê û tira hesabê nê îxanetê tarîxî bipersê.  Bêşik ganî ciwanê Kurdîstanî û cinîyê ciwanî vera nê şerê leyminî sefanê verênan ê têkoşînî de cayê xo bîgêrê. Ma sey cinîyan ê ciwanan hêrişanê dişmenî red kenê. Ma do xeta azadîye yê Rayber Apoyî bipawê û xurtêr bikerê. Ma do rêçê Şehîde Şaristan Farqîn ya ke Zap de sey qehremane şer kerdêne, û şehîdanê xo de têkoşîn bikerê û qesasê heme şehîdan bigêrê.

Ma veng danê heme ciwananê kurdan sere de cinîyê ciwanî yê Başûrê Kurdîstanî vera dişmenîya PDKyî bi ruhê têkoşîn û serkewtişî tewrê sefanê gerîlayan bibê. Têkoşînê gerîlayan do rejîmê faşîstî yê dewleta tirke birijno. Kurdîstan de cuye bîya şer. Cewabê vera nê şerî tewrbîyayîşê gerîlayan o. Na çarçewe de ma veng danê heme ciwanan û cinîyan ê ciwan ê kurdan wa verê xo bidê sefanê gerîlayan. Semedê azadîye werin cenga azadîye.''