Rojnamegerî Marlene Forster û Matej Kavcic Şingal de hetê artêşa Iraqî ra ameyî destbendkerdene û zîndanêkê Bexdadî de tecrîdkerde yê. Dîya zanayene ke Forstere 3 rojî yo grevê vêşanîye de ya.
Rojnamegerî Marlene Forster û Matej Kavcic 20ê nîsane de Şingal de ameybî destbendkerdene. Goreyê agahîyan wird rojnamegerî zîndanêkê Bexdadî de tepişîyenê.
Dadîya Marlene, Lydia Forster beşdara bernameyê Çira Reportî ya Çira TVyî bîye û derheqê rewşa peyêne ya rojnamegeran de qisey kerd. Lydia Foster pare kerd ke aye partîyanê Almanya û Wezîrîya Karanê Zereyî rê mektubêke şawite û waşt ke seba rojnamegeran têbigêrê.
Lydia Forster da zanayene ke Sersefîrîya Almanya ya Iraqî cewab dayo ci û vato ke kênaya aye û embazêkê ci Bexdad de zîndanêkê îstîxbaratî de tepişîyenê. Sersefîrîye pê hesnayo ke Marlene 3 rojî yo grevê vêşanîye de ya û embazê xo reyde hucreyê yew kesî de tepişîyena.
Marlene Forster û Matej Kavcicî Şingal de temsîlkaranê dezgehan de pêvînayîşî kerdî û xîret kerd ke rewşa Şingalî rayaumûmîye de pare bikerê. Dezgehê Kultur û Hunerî û Weşîye yê Şingalî seba rojnamegeran muracar kerd û înan de pêvînayîş kerd.
Endamanê dezgehan Şoreş Şengalî û Tehsîn Şengalîyî waşr ke rojnamegerî wa cade bêrê veradayene.
