Endama Konseya Hemserekîya Pêroyî ya KCKyî Elîfe Ronahî derheqê 4ê Nîsane rojbîyayîşê Rayberê Şarê Kurdî Abdullah Ocalanî de qisey kerd.

Qiseykerdişê Ronahî ra beşêk wina yo:

''Cinîyî û kurdî 4ê Nîsane sey rojbîyayîşê xo vînenê. Rojbîyayîşê Rayberîya ma sere de Rayberîya ma rê, dayîke Uweyşe rê, cinîyan ê kurdan û şarê kurdî rê fîraz kenê. Ma na roje sey rojbîyayîşê estbîyayîş û nasnameyê kurdan vînenê.

Dewleta tirke bi taybetî Erdogan û Bahçelî vera Rayberîya ma hêrişanê giranan kenê. Nê xîret kenê ke merdimîye fikr û îdeolojîya Rayber Apoyî ra dûrî bigêrê coka ey tecrîd kenê. Her ke paradîgmaya Rayberîye tesîrê merdiman kerd hêzê hegemonîkî û dewleta tirke tira tersayî coka wazenê vengê Rayberîye bi temamî bibirnê. Wexto ke înan pêvînayîşê telefonî yê Rayberîye birna tersê xo yo pîl mojna.

Şarê kurdî pê raştîya Rayberîye xo newe ra aferna. Coka wexto ke vajîyeno PKK ma xo sey partîya Rayberîye vînenê. Ganî kurdî pêro bizanê ke tarîxê ma xurt o. Hêzê ma esto ke ma xo biresnê kokê xo, tarîxê xo. Ganî ma pê hêzê xo bawer bikerê û seba wedaritişê tecrîdê vera Rayberîye tim çalakîyan bikerê. Fîrazkerdişê rojbîyayîşê Rayber Apoyî pê têkoşînê bêmabênî beno.

Seba cinîyan ê kurdan zî rojbîyayîşê Rayberîye zaf cîya yo. Rayberîye azadîya cinîyan û azadîya komelî kerde yew. Eke ewro seba Rayberîye bi hezaran cinî û camêrdî pîya têkoşîn kenê û canê xo danê sebebê ci o cewhero ke Rayber Apoyî afernabi.

Eke ma nê prosesî hol biercnê eşkenê peynîya tecrîdî bîyarê û azadîya Rayberîye bîyarê ca. Coka ganî her cade çalakîyî bêrê kerdene. Ma sey gerîlayan seba nê armancî heta peyêne do têkoşîn bikerê.

Ma 8ê Adare û Newroze de dî ke şarê ma senî wayîrê Rayberîye vejîyeno. 4ê Nîsane de ganî na hemle bêra xurtkerdene. Şiknayîşê nê kerdişanê xiraban têna pê têkoşîn beno.

Rayber Apo seba şar û cinîyan ê kurdan babetêka tewr hesas a. Ganî ma nê prosesî de tecrîdê mutlaqî bişiknê. O çax ma eşkenê Rayberê azadî reyde kurdanê azadan û merdimîye azade biafernê.

Eke ma têkoşînê xo xurtêr bikerê ma do bieşkê welatê azadî de rojbîyayîşê Rayberê azadî fîraz bikerê. Seba servistişê ney ganî paradîgmaya Rayberîye hol bêra famkerdene û çalakîyî bêmabên dewam bikerê.

Ma rojbîyayîşê Rayberê xo yê kurdan, dostan, cinîyan, şehîdan û xoverdayoxanê zîndanan fîraz kenê. Ma her kesî rê têkoşînê ci de serkewtiş wazenê.''