Bajarê Şirnexî û qezayanê ci de xebatê seba weçînitişî bîyî vêşî. Namzedê HDP’yî yê seba hemşaredarîya Deştedarî Mehmet Balicakî qalê projeyanê xo kerd.

Balîcakî wextêkê dergî ra bi ke bi weyîkerdişê heywanan û citkarîye debara xo kerdêne û wina vat, “Dimayo ke înan îmkanê nê karî nêverda, mi dest bi ramitoxîye kerde û bar berdêne welatanê bînan û ardêne. Serranê peyênan de mi giranî daye xebatanê partîye. Hewna zî ez şaredarîye de encumen a. Ez heta sinifa 5’ine eşkaya şirî mektebe. Serre û nîm zîndan de menda. Bi vînayîşê mi, mîyanê ê serre û nîmî de mi qasê yewo ke unîversîte waneno perwerde dî.”

Balicakî ard ziwan ke heta 2008 partîya înan bajarekê Deştedarî de çinbî, seba ke na kemasîye raste ra wedarîyo ê dest bi xebate kerdo û vat, “Bajarekê ma bi mirdîya xo pîl o. ma vat, ‘Ma eşkenê weçînitişî de bi ser bikewê.’ Ma a game tîya awanîya partîya xo akerde.” Bêguman na yewe seba îqtîdarê AKP'yî rind nêbi û bi yew komploye înan pîya bi mi 12 embazanê ke awanîya partiye akerdebî ameyî tepiştene.”

Balicakî dewamê qiseykerdişê xo de vat, “Şar nika her çîyî vîneno. Barbarîya ke wextê ‘qedexeyê tebervejîyayîşî’ de amebi kerdene dî, kerdişê qeyûman, zext û zordarîyî dîyî. Nika zî xoverdayîşê Leyla Guvene û xoverdayoxanê zîndanan vîneno. Îhtîyacî çinya ke nê şarî rê qalê zaf çîyan bêro kerdene. Şar do seba ameyoxê xo û domananê xo reya xo bido.

Ma do nê weçînitişî de zî bi ser bikewê. Ma keyeyan de gêrenê, goşdarîya şarê xo kenê. Goşdarîya waştişanê înan kenê û înan rê qalê projeyanê xo kenê. Ma do şarê xo reyde 31’ê Adare de reya xo bidê û bi destûrê Homayî ma do bi ser bikewê.”