Muxabîrê Ajansê Mezopotamya (MA) Adnan Bîlen û Cemîl Ugur, muxabîra Jinnewsî Şehrîbane Abî û rojnamegere Nazan Sala 2ê nîsane de Wan do vejîyê verê mehkeme. Rojnamegerî semedo ke îşkenceyê helîkopterî vistbi rojdem ameybî hedefkerdene.

Roniştişî ra verî Komeleya Rojnamegeran a Dîcle-Firatî (DFG) û Platformê Rojnamegeran ê Cinîyan ê Mezopotamya (MKGP) Amed de eşkerayîye kerde.

Hemserekê DFGyî Serdar Altanî ard ziwan ke rojnamegerî semedo ke raştîyî resnayî rayaumûmîye yenê muhakemekerdene û vat: ''Rojnamegerîye sûc nîya. Rojnamegerî zîndan de nê wa peyê xeberan de bê. Wa embazê ma cade vera bidîyê.''

Vervatoxa MKGPyî Ayşe Guney zî da zanayene ke heqê xeberkerdişî yeno muhakemekerdene û tedaya vera rojnamegeran her ke şino zêdîyena. Guneye vat: ''Embazê ma cinîyî dima ke tepişîyayî koxûşê camêrdan de ameyî cakerdene. Ê hawayê serdî de batanîye nêdîyaye înan. Şexsê cinîyan ê kurdan de nê embazê ma ameyî cezakerdene. Ma do cewabê nê kerdişan bidê û raştîyan bidê pêhesnayene.''

Guneye venga pêro rojnamegeran da ke 2ê nîsane de tewrê dewa bibê.