Hemserekîya Konseya Rayberdişî ya KCKyî bi eşkerayîyêke Hemleya 1ê Hezîrane fîraz kerde. Eşkerayîye wina ya:

Eşkerayîye wina ya:

''Ma Hemleya 1ê Hezîrane ya ke têkoşînê azadîya Kurdîstanî de dewrêko zaf girîng o, şaranê xo, hêzanê şorişgêran û demokratan rê, merdimîye rê fîraz kenê. Şexsê şehîdanê Hemleya 1ê Hezîrane de ma pêro şehîdan bi rêz û hûrmetî yad kenê. Ma soz danê ke girêdayeyê vîrameyîşê şehîdan bibê û vîrameyîşê înan biresnê serfîrazîye.

Hemleya 1ê Hezîrane vera hêrişanê tasfîyekeran ê zereyî teberî yê sey Komployê Mîyanneteweyî, hemleyêka têkoşîn û azadîye ya ke serkêşîya gerîlayan de dîyabî destpêkerdene. Tasfîyeya zereyî waştêne têgêrayîş xeta ci ya azadîye û armancanê xi ra dûrî bigêra û biqedîna. Hemleya 1ê Hezîrane vera her çi bîye gamêka tarîxîye. Hemleya 1ê Hezîrane reyde tasfîyekerî tasfîye bîyî û armancê hêzanê komployî ameyî pûçkerdene.

Hemleya 1ê Hezîrane bi xeta xo ya îdeolojîke, sîyasî, komelkî û leşkerî vera îxanet û teslîmîyetî tewirê azadîye yê kurdan, ruh û têkoşînê xo xurt kerd, esasê neteweya demokratîke û rêxistinîye de vejîyaye werte. Hemle seba awankerdişê paradîgmaya ekolojîke, demokratîke û azadîgîrîya cinîyan a Rayber Apoyî zî zemînêko xurt awan kerd û bîye bingeyê Şerê Şarî yê Şorişgêrî. Ewro xoverdayîşo heybetîn ê Zap, Avaşîn, Metîna, Heftanîn û Xakurkê yeno manaya leweyê Hemleya 1ê Hezîrane.

Vera hêrişanê îşxalî yê dewleta tirke ya faşîste gerîlayî xeta serfîrazîye de bi çêrî xo ver danê û derbanê giranan danê dişmenî ro. Ma reyna şahîdê Zap, Avaşîn û Metîna yê ke ruhê Hemleya 1ê Hezîrane resnenê asta tewr berze. Ma pêro fermandar û şerwananê HPG û YJA-Starî yê Zap û Avaşînî selam kenê û embazan rê serkewtiş wazenê. Nê şerî de dewleta tirke ya îşxalkere û kolonyalîste û şirîkê ci do bin bikewê, xoverdayîşê gerîlayan û şarî do ser bikewo.

Dewleta tirke ya îşxalkere û kolonyalîste waştêne mîyanê wextêkê kilmî de xoverdayîşê gerîlayan bişikna, Başûrê Kurdîstanî îşxal bikera. Xoverdayîşê gerîlayan ê fedayîyî planê dewleta tirke ya faşîste xera kerdî. Gerîlayê azadîye vera teknîk, çeka kîmyewîye ya dişmenî xoverdayîşêkê pîlî kenê, bi ruhê Apogîran şer kenê û reyna îsbat kenê ke ê do binê pêro şertan de zî Kurdîstanî û şarê kurdî vera hêrişanê dişmenî bipawê.

Her ca de ke dişmen wazeno tede ca bibo gerîlayî bi hêzêkê xurtî çalakîyanê serkewteyan kenê û derbanê giranan danê artêşa îşxalkere ro. Dewleta tirke û faşîzmê AKP-MHPyî pêro hêvîya xo şerê vera kurdan rê girê daya û raştîyan rayaumûmîye ra nimnenê.

Dewleta tirke vera gerîlayan sûcê şerî kena û çekanê kîmyewîyan xebitnena. Şuxilnayîşê çeka kîmyewîye sûcêkê merdimîye û şerî yo. Sere de Neteweyê Yewbîyayeyî ma venga pêro hêz û degehan danê ke wa vera ney bêveng nêmanê û tewirê xo vera Tirkîya eşkera bikerê. Bêvengîya vera çeka kîmyewîye şirîkîya sucê merdimîye ya. Ma venga şarê xo, dostanê xo û pêro merdimîye danê ke vera nê sucê merdimîye yê dewleta tirke têkoşîbê xo geşêr bikerê.

Dewleta tirke û faşîzmê AKP-MHPyî wayîrê ferasetê dişmenîya kurdan ê. Hedefê înan tena gerîlayan û têgêrayîşê azadîye nê pêro kurdî yê. Armanco esas ê dewlete çinkerdişê estbîyayîşê kurdna o. Nê esasî ser o hêrişê kurdan kena, kurdan qir kena û sey Rojawanî wazena demografîya Kurdîstanî bivurna. Dewleta tirke wazena Amerîka û Ewropa sere de, pêro hêz û dezgehan şirîkê qirkerdişê kurdan bikera û înan rê ferz bikera ke paştî bidê ci. Ma venga nê hêzan danê ke wa nêbê şirîkê hêrişanê qirkerdişî yê dewleta tirke. Ganî ê şarê kurdî de, hetê têkoşînê tewr meşrû û heqdarî de ca bigêrê.

Vera dişmenîya kurdan a dewleta tirke û faşîzmê AKP-MHPyî, sere de şarê kurdî ganî pêro şarî, dostê ma û terefgîrê demokrasî her ca de têkoşîn bikerê. Gerîlayî senî vera dişmenî xo ver danê û têkoşîn kenê ganî her kes vera faşîzmê AKP-MHPyî têkoşînî geşêr bikero. Roşnvîr, nuştox û hunermendî verê komelî de wayîrê mesuldarîyan ê. Vera hêrişanê topyekûnan ê serê kurdan ganî nê kesî hîna zaf wayîrê wezîfeyanê xo vejîyê û serkêşîya komelî bikerê. Ganî merdimê roşnvîrî înîsîyatîf bigêrê û têbigêrê, ganî gerîlayan û şarî reyde bibê. Gerîlayî vera çeka kîmyewîye, îxanet û îşxalî xo ver danê. Roşnvîr, nuştox û hunermendî ganî serkêşîya nê têkoşînî bikerê.

Koordînasyonê Komalanê Ciwanan vera îşxal û qirkerdişî Hemleya Werin Cenga Azadiyê dabî destpêkerdene. Ma na hemle zaf manadar vînenê û dîyar kenê ke ma na hemle reyde yê. Sere de ciwanê kurdî yê welatperwerî, ma venga pêro ciwanan danê ke wa tewrê na hemle bibê. Gerîlayî bi ruhê ciwanan xo ver danê û têkoşîn kenê. Şarê Kurdîstanî û ciwanê ci zî ganî her ca de bi ruhê ciwanan ê Apogîran têkoşînî geş bikerê.

Dewleta tirke ya kolonyalîste û şirîkê ci do bin bikewê. Serfîrazîye do biba yê cinî, şar û merdimanê ke zerrîya înan bi adirê azadîye vêşenê û bi ruhê 1ê Hezîrane xo ver danê.''