Endamê Konseya Rayberdişî ya KCKyî Sabrî Okî programêkê taybetî yê Stêrk TVyî de qisey kerd. Roportajê Sabrî Okî ra qismêk wina yo:

''Ganî şar, têgêrayîş û dostê ma sebeb û netîceyanê Komployê Mîyanneteweyîyî yê 15ê Sibate hol fam bikerê. Rayber Apoyî vatbi ke ' Vera komployî sîya gire medê, tira dersan vejê û rolê xo kay bikerê.' Rayber Apoyî bi têkoşînê xo têgêrayîşê ma payra verda û komplo betal kerd. Têkoşînê Rayber Apoyî 25 serrî yo dewam keno. Heta ke Rayber Apo hetê fîzîkî ra azad mebo ganî qet çew zî cuyeya rehete meciwîyo. Rayber Apo zîndan de yo. Coka komplo bi metodanê cîya cîyayan dewam keno.

Rojdemê şarê kurdî Rayber Apo yo. Rol û mîsyonê muhîmî yê zîndanan est ê. Ez xoverdayîşê embazan selam kena. Teber de zî nobeta dayîkan û grevê vêşanîye est ê. Ez dayîkan rê zî selamanê xo şawena. Nê dayîkan ra dayîkêke vatêne Ma soz dayo, ya mirenê ya netîce genê. Bêserkewtişî yewna rayîr çîn o. Ma do heta peynî xover bidê. No yew ruh o, vindertiş o. Ganî ciwanî çalakîyanê dahîna radîkalan bikerê, dormeyê dayîkan de bêrê têhet. Hîrê serrî yo Rayber Apoyî ra xebere nîna girewtene ganî ciwan û cinîyê kurdan wirzê payan ser.

Gerîlayanê Kurdîstanî HPG û YJA Starî şeranê tunelan de darbeyê girdî dayî dişmenî ro. Vera teknîkê peyênî û çekanê kîmyewîyan têkoşîno tarîxî yeno dayene. Ez reyna şehîdanê ma yad kena û hemrayê ma yê ke nika mewzîyanê şerî de têkoşîn kenê, înan bi heskerdiş selam kena. Semedê destfînayîşê netîceya tarîxî zaf firset û îmkan est ê la zaf tehlukeyî zî est ê. Coka wa hêvî moral û coş bibê la ganî çew xo rehet vera medo. Ganî her kes rolê xo bîyaro ca. Bêşik gerîlayî xover danê la ganî her kes xover bido û rolê xo kay bikero.

Dişmen seba ke hinî peynîya xo vîneno dahîna bîyo wehşî. Ça de destkewteyê kurdan est ê wazeno çîn bikero. Xora koyanê Kurdîstanî de vera gerîlayan hêrişî bêmabên dewam kenê. Gerîlayî zî cewabê hêrişan danê. Reyna seba ke şarî erdê ci ra raqilno 24 saetî hêrişê Rojawanî keno. Şarê Rojawan zî vera heme hêrişan xover dano. Dewleta tirke peynîya nê şerî de fatisyaye, ekonomîya ci cum bîye. Fatûraya tewr pîle komel dano.

Pêvînayîşê ke îdarekarê dewleta tirke dewrê peyênî de Hewlêr û Bagdadî kerdî vera PKKyî ameyî kerdene. Xora xeylêk erdê Iraq û Başûrî îşxal kerdo. Bi desan nuqtayan de leşkerê xo ca kerdî û heme problemanê Iraqî de engişta ci est a. Ma pê bawer ê ke Iraq hemkarîya leymine ya bi Tirkîya mekero. Badê Baxdadî paytextê Başûrî Hewlêr de Mesut Barzanî, Neçirvan Barzanî û Mesrur Barzanî reyde pêvînayîşî ameyî kerdene û ame vatene ke do têkîlîya înan sey verî dewam bikero. Ganî şarê ma vera PDKyî tewirê xo ramojno. PDK mecbur nîyo paştî bidê PKKyî la wa vera ci şer mekero û paştî medo dişmenê kurdan.

Rayaşîyayîşo ke do 17ê sibate de semedê azadîya fîzîkîye ya Rayber Apoyî Koln de bêro kerdene, zaf muhîm o. Senî ke prosesê komployî de şarê ma verê xo da Roma û şarê kurdî wirişt payan ser, ganî hêvî, heskerdiş û bawerîya a roje ewro zî bibo. Ganî heme şarê ma yo ke Ewropa de yo tewrê nê rayraşîyayîşî bibo. Çunke no rayraşîyayîş do tesîrê ameyoxê ma bikero. Coka ganî rayraşîyayîşêko tarîxî bêro kerdene. Goreyê mi prosesê winayênî de kam ke tewrê nê rayraşîyayîşî mebo, gunekar o. Ez nika ra kesanê ke rayraşîyayîş hazir kerdo û kesê ke tewrê ci benê  pîroz kena û serkewtiş wazena.''