Artêşa tirke ya îşxalkere dewa Hermelê ya qezaya Çiwarta ya Silêmanî ya Başûrê Kurdîstanî bi droneyî wesayîtêk da bombayan ver. Hêriş de hîrê sîvîlî ameyî qetilkerdene. Ramitoxê wesayîtî Burhan Saîdo ke ame qetilkerdene dewa Çemeke ya qezaya Şarbajêrî ya Silêmanî ra bi. Wird kesê bînî ke cayê ey de bî ê zî babî û lajê ci bî.

Badê hêrişê dewleta tirke cenazayî ameyî berdene Dezgehê Tibê Edlîyî yê Silêmanî û ûca ra şawîyayî memleketanê înan.

Cenazaya Şehîd Burhan Saîd hetê merdimanê ci ra ameye girewtene. Cenazaya  Burhan Saîdî  Camîya Haci Ebubekirî de ameye şutene û Mezelanê Seywanî yê Silêmanî de bi merasîmêkî ameye definkerdene.

Cenazayê babî û lajê ci yê ke ameyî qetilkerdene do herêma Çiwarta de bêrê definkerdene.