Hêrişê dewleta tirke yê vera Silêmanî de hîrê sîvîlî ameyî qetilkerdene
Dewleta tirke ya îşxalkere qezaya Şarbajêrî ya bajarê Silêmanî yê Başûrê Kurdîstanî de hêrişê wesayîtêkî kerd. Hêriş hîrê sîvîlî ameyî qetilkerdene.
HÊRIŞÊ ÎŞXALÎ
Goreyê xebera RojNewsî saetanê nêmroje de nêzdîye Çiwarta ya qezaya Şarbajêrî ya bajarê Silêmanî yê Başûrê Kurdîstanî de wesayîtêk bi droneyê çekdarî yê ame hedef girewtene.
Bombardumanî de hîrê sîvîlî ameyî qetilkerdene. Kesê ke ameyî qetilkerdene înan di kesî babî û lajê ci yê. Nasnameyê kesanê ke ameyî qetilkerdene hema nêameyî tesbîtkerdene.
Goreyê doneyanê fermîyan hêrişê dewleta tirke yê vera Başûrê Kurdîstanî de sereyê 2024î ra nata 20 kesî ameyî qetilkerdene.
PDK eşkera paştî dano hêrişanê dewleta tirke ya îşxalkere. Bado ke dewleta tirke û PDKyî 15ê tebaxe de pêkerdişê asayîşî îmza kerd hêrişî zêdîyayî.
