Gulîstane Tara ke 23ê tebaxe de qezaya Seyîdsadiqî ya Silêmanî de bobmardumanê dewleta tirke ya îşxalkere de ameye qetilkerdene, cenazaya ci memleketê ci Êlih de bi slogananê ''Şehîdî Nêmirenî'' ameye definkerdene.

Cenazaya Gulîstane tara vizêr Berê Sînorî yê Xabûrî ra bi slogananê ''Şehîdî Nêmirenî''bi hewayêkê qirseyî ameye pêşwazîkerdene. Dima ra cenaza semedê otopsî ameye berdene Nêweşxaneyê Dewlete yê Sirnakî. Badê otopsî cenazaya Gulîstane Tara ardîyaye memleketê ci Êlihî. Tîya cenaza bi slogananê “Şehid namirin”, “Jin jiyan azadî”,” Bimre îxanet bijî Kurdistan”  ameye pêşwazîkerdene û bi konvoyê bi seyan wesayîtan ameye berdene dewa Tilmercî.

Cinîyan ke cenazaya Gulîstane Tara kiriştêne waşt heta Mezelanê Tilmercî bêrê la polîsanê tirkan hêrişê şarî kerd ke bi sloganan cenaza kiriştêne. Ame waştene ke têna keyeyê Gulîstane Tara û wekîlî cenaza defin bikerî. Şar vera nê vejîya û waşt şiro mezalan. Polîsan hêrişê şarî kerd. Şarî bi sloganan cewabê polîsan da.

Gama ke cenaza gerîyaye zere wekîlê DEM Partî Zekî Îrmez û Sabahate Erdogan Saritaş ameyî derbkerdene. Keye û cinîyê ke bi xoverdayîşî bi zorî kewtî zere înan Gulîstane Tara defin kerd. Serê mezelê Gulîstane Tara de vilîkî û kameraya ci ameyî ronayene.

Birayê Gulîstane Tara, Ahmet Tetîkî ke serê mezeleya waya xo de qisey kerd vat: ''Rayîrê çapemenîya azade rayîro bimbarek o. Ma dî ke hemrayê Gulîstane senî pabesteyê aye yê. Ma Silêmanî de dî ke embazê ci senî pabesteyê aye yê.''

Wekîla DEM Partî Zeynepe Oduncu zî nê vatî: ''Ma dî ke embazê ma Herêma Federe ya Kurdîstanî de binê çi zehmetîyan de xebityenê, çapemenîya azade senî tengayî ancena. Bi nê hêrişî ma hêrişê îqtîdarê AKP-MHPyî yê vera şarê ma dahîna nêzdî ra dî. Xora hedefê îqtîdarî de tim cinî est ê. Tim peyê qetilkerdişê cinîyan de yo. Ma do têkoşînê nê cinîyan xurtêr bikerê. Jin jiyan azadî.''

Badê definkerdişî birayê Gulîstane Tara, Mustafa Mesut Tekîkî  verê mezelan de xîtabê şarî kerd. Tekîkî verî seba ke wayîrê şehîdan vejîyayî û paştî dayo înan şarê kurdî rê spas kerd û vat: ''Ma sey keye û hemrayanê Gulîstane û embaza ci soz danê şarê kurdî ke heta ardişê haştîye ma do têkoşîn bikerê.''

Salona veyve û kombîyayîşî ya Roja ya taxa Pazar yerî de tezîye ameye ronayene.