Dêrsim de seba Gulîstan Doku (21) ya ke wendekara Perwerdeyê Domanan ê Zanîngehê Munzurî bîye û 5ê çeleyî ra nata vînbîyaye ya xebatê cigêrayîşî dewam kenê. Bi seyan wendekaran vizêr zî çalakîyê xo dewam kerdî. Wendekaran çilayê telefonanê xo tavistî û sloganê ''Gulîstane ça de ya'', ''Cinîye, Cuye, Azadîye'', ''Dêrsim bêveng mebe, wayîrê Gulîstane bivejîye'' vatî.

Wendekaran îfade kerd ke heta ke Gulîstane bêra dîyene ê do çalakîyanê xo dewam bikerê.

Hetê bînî ra ame zanayene ke wexto ke cayê mendişî yê wendekaranê cinîyan ê bi nameyê Ehlîbeytî de çalakîya protesto dewam kerdêne di kesê ke rîyê înan de maskeyî estbî dekewtî zereyê bîna û nê di kesan wendekarê cinîyî tacîz kerdî û fotografî antî. Wendekaranê cinîyan vera nê kesan nêrazîbîyayîşê xo mojna û venga wezîfedaranê asayîşî da. La di kesê bi maskeyî remayî. Ame îdîakerdene ke nê di kesanê bi maskeyan bi ziwanêkê xerîbî qisey kerdêne.