Cenazaya  gerîlayê HPGyî Bariş Bardakçiyo ke 31ê gulane Çelê de şer de şehîd bi, seba ke  dozgerê Dozgerîya Colemêrgî tatîl de yo nêdîyena keyeyê ci. Keyeyê Bardakçiyî 4ê temmuze de xebere girewte ke lajê înan şehîd bîyo û 10ê temmuze de seba ke cenaza bigêro muracatê Serdozgerîye kerd.

Muracatî ra dima keyeyî seba testê DNA numûne da û 11ê tebaxe de keyeyî rê ame vatene ke hewteyêkî ra dima ganî keye seba  girewtişê cenaza muracatê Serdozgerîya Colemêrgî bikero.

Keyeyî Serdozgerîya Komare ya Colemêrgî rê telefon kerd la înan rê ame vatene ke seba ke dozger tatîl de yo ê nêeşkenê cenaza bigêrê. Avûkatanê keyeyî zî seba girewtişê cenaza xîret kerd la dozgerê nobetdarî avûkatan rê vat ke dosya înan de nîya. 

Keyeyî seba ke cenaza bigêro heta 1ê êlule do pabeyê dozgerî bibo.