Hêriş û îşkenceyê dewleta tirke yê vera goristan û cenazayanê kurdan dewam kenê. Heta ke cenazayî yenê teslîmkerdene, testê DNA dîyeno keyeyan rê îşkence yeno kerdene. Dewlete nêverdena ke keyeyî cenazayanê xo bigêrê û çew tewrê merasîmê cenaza bibo.

Hemserekê MEBYA-DERî Şeyhmus Karadagî derheqê hêrişanê vera cenaza û goristanan de ajansê ma rê qisey kerd. Karadagî pare kerd ke 2019 de Licê de şerê mabênê gerîlayan û leşkeran ra dima bi mengan cenazayê gerîlayan serê koyî de vera dîyayî û keyeyan rê îşkenceyêko psîkolojîk ame kerdene.

Karadagî vat: ''Nê keyeyan muracatê dezgehê ma kerd. 45 rojan ra dima keye, wekîl û dezgehê ma seba teslîmê cenazayan şîyî cayê şerî. Xora cenazayî parçe bibî, ma daran ser o parçeyê cenazayan arê dayî. Keyeyan 45 rojan no dej ant. Pêro cenazayan rê îşkenceyo winasên yeno kerdene. Cenazayan rê îşkenceyo fîzîkî yeno kerdene û tay cenazayî tewr nêdîyenê keyeyan. ''

Karadagî eşkera kerd ke dewlete nêverdena çew muracatê dezgehê înan bikero û vat: ''Hêzê dewlete nêverdenê  ma keyeyan reyde şorê testê DNA yan zî cenazayan bigêrê. Dewlete wazena keyeyan teyna war verda. Wexto ke cenazayî defin benê keyeyan rê gef yeno wendene. Keyeyêko ke domanê înan Dêrsim de şehîd bibi wexto ke şinê gasilxane vîneneê ke çimê cenaza ameyo vetene û vêşnayene. Rêçê fîşekan qet serê bedenî de çinbîyo.  Doman pê çeka kîmyewî kişîyayo. Nê zî îşkenceyo psîkolojîk o. Roja roşanî de dewa Sîsê ya Licê de goristan amebi vêşnayene. Nê îşkenceyan ra semed hêrsê keyeyan zî zêdîyeno. Merdimê wayîrwijdanî ganî nê kerdişan qebul nêkerê.''

Karadagî da zanayene ke polîsî zaf reyî cenazayan nêdanê û goristanê bêkesan de defin kenê. Karadagî vat: ''Wexto ke keyeyî cenazayan gênê dewlete nêverdena wecîbeyê dînî bêrê caardene. 3 mengî yo seba testê DNA 2 gerîlayê ke Licê de şehîd bîyî nînan ra numûne nêna girewtene. Pêro muracatî ameyî redkerdene.''

Karadaf îfade kerd ke ê tim hetê keyeyan de yê û vat: ''Xora keyeyî wayîrê cenaza û goristananê xo vejîyenê. Se beno wa bibo wa keyeyî muracatê ma bikerê. Ma do hetê înan de bibê. Êlih, Mêrdîn, Amed, Cizîre, Wan, Çukurova, Îstanbul û Îzmîr de şubeyê ma estê. Keyeyî eşkenê nê cayan ra muracatê ma bikerê.''