Komîteya Şar û Bawerîyan a KCKyî bi wesîleya destpêkerdişê menga Remezanî eşkerayîyêke daye.

Eşkerayîye wina ya:

''Alemê Îslamî dest bi Remezanî kerd ke Îslam de rojê  tewr girîngî yê. Şaranê Rojhelatê Mîyanênî û komelanê misilmanan emser mîyanê şerî de, binê hêrişanê pîlan de  dest pê rojeyê Remezanî kerd. Ma hêvîdar ê ke Remezano emserîn do bibo wesîle ke misilmanî heqê zorî û zehmetîyan ra  bêrê û ma venga pêro misilmanan danê ke hîsanê xo yê yewî, wayûbiratîye û paştdayîşî xurtêr  bikerê.

Hetêkî de hêrişê dewleta tirke  yê vera Rojawan, Vakur, Şingal û pêro waranê kurdan û hetê înî de  hêrişê Îsraîlî yê vera Filîstînî; tek çareya şaranê Rojhelatê Mîyanênî û alemê Îslamî vera nê hêrişan caardişê yewîya xo yo. Bi wesîleya menga Remezanî ma venga pêro misilmanan û bawermendan danê ke vera Fîrawun û Nemrûdanê nê çaxî tewirê xo bimojnê. Îsraîl û dewleta tirke nê rojanê bimbarekan de şaran qetil kenê. Mabênê nê wird dewletan de yew cîyatîye çin a. Ma venga misilmananê Tirkîya û şarê Îsraîlî yê wayîrwijdanî danê ke vera nê dewletanê ke dînî sey hacetî şuxilnenê, bi paradîgmaya Neteweya Demokratîke têkoşîn bikerê.

Misilmanê ercîyayeyî!

Goreyê Quranî vera  hêrişanê înkarkerdişî pêro çalakîyê xoverdayîşî sey roje yê. Şarê kurdî binê hêrişanê qirkerdişî de yo, ziwanê înan qedexe yo, kulturê înan binê asîmîlasyonî de yo û her roje ewladê kurdan bi çekanê kîmyewîyan yenê qetilkerdene. Rayberê Şarê Kurdî binê tecrîd û îşkenceyî de yo. Zîndanan de tepişteyê kurdî grevê vêşanîye de yê. Vera Şingal, Rojawan, Başûrî û waranê kurdan hêrişî dewam kenê. Vera nê kerdişan ma venga şarê kurdî danê ke menga Remezanî de têkoşînê xo xurtêr bikerê. Çunke seba misilmananê ke binê hêriş û înkarî de yê xoverdayîş sey îbadetî yo.

Şarê ma yê Vakurî prosesêkê girîngî de dest pê Remezanî keno ke nê prosesî erk û mesuldarîye dano ci. Bi taybetî ganî şarê ma weçînayîşan de bi rolê girîngî têbigêro. Ganî alîm û seydayê kurdî vera ê kesanê ke dînî sey hacetî şuxilnenê têkoşînêkê xurtî bikerê, hêverî vera hêzanê kontrayan ê sey HUDA-PARî têkoşîn bikerê. Hêzê munafiqî yê sey AKP-MHP û HUDA-PARî seba ke weçînayîşan de ser bikewê do her karî bikerê. Wa misilmanî Remezan de nêzdîyê sifreya înan nêbê û vera înan tewirê xıo bimojnê. Ma venga misilmananê kurdan danê ke nêşorê camîyanê dewleta tirke ke nînan de her roje kurdan rê heqaret yeno kerdene. Şarê ma nimajê xo keyeyê xo de, taxa xo de, bi îmkananê xo biker.

Şarê ma yê Başûrî zî binê hêrişanê dewleta tirke de dest pê Remezanî keno. Ma acî wazenê ke wa şarê ma yê Başûrî vera hêrişanê dewleta tirke nêrazîbîyayîşê xo bimojno. Dewleta  tirke dişmena kurdan a û îşxalê Başûrî armanc kena. Ma pê bawer ê ke şarê ma yê Başûrî vera Remezan de bi xoverdayîşêkê pîlî îşxalê dewleta tirke do biqedîno.

Şarê ma yê Rojhelatê Kurdîstanî bi xoverdayîşê 'Jin, Jiyan, Azadî' menga Remezanî pêşwazî keno. Ma hêvî kenê ke şarê ma yê Rojhelatî hîsanê yewîye û paştdayîşî xurtêr bikero, bawerîya azadîye û têkoşînê cinîyan pîlêr bikero û xoverdayîşî rê dewam bikero.

Şarê ma yê Rojawanê Kurdîstanî binê gef û hêrişanê dewleta tirke ya faşîste û qirkere de dest pê Remezanî keno. Ma pabeyê ci yê ke şarê Rojawanî bi karanê xo yê serê peymana komelkîye, bingeyê xopawitişî de Remezanî derbaz bikerê. Ma venga pêro misilmananê Rojawanî danê ke hişmendîya Neteweya Demokratîke berz bikerê û sîstemê Îdareyê Xoserî bi rêxistinîya xo bihêz bikerê.

Misilmanê Kurdîstanî yê Ercîyayeyî;

Ma hêvî kenê ke şima verê xo bidê awankerdişê wayûbiratîya şaran, yewîya şaran xurtêr bikerê. Ma hêvî kenê ke nê Remezanî de roje, dûa û nîyetê şima do qebul bibê.''