Tepişteyê dewaya PKK û PAJKî 27ê teşrîna peyêne ya 2020î ra nata vera tecrîdkerdişê Rayberê Şarê Kurdî Abdullah Ocalanî û vera binpaykerdişanê heqanê xo grevê vêşanîye de yê. Grevê vêşanîye roja 185. de dewam keno. Hemserekê HDPyî yê Amedî Zeyyat Ceylanî hêrişê dewleta tirke yê vera kurdan û grevê vêşanîye ercnayî.

Ceylanî vist vîrî ke îqtîdar key teng bibo rojdem vurîyeno û îfade kerd ke mesuldarîya komelî ya vera ney rojdemê xo teqîb keno. Ceylanî vat: ''Nika koyan, deştan û zozanan de bombardumanêko giran vera kurdan yeno kerdene. Çarçewa polîtîkaya înkar û çinkerdişê meseleya kurdan de hêrişê vera HDPyî dewam kenê. Ma vînenê ke seba prosesê weçînayîşî  yê lezabezî zî amadekarîyêka xurte esta. Coka hêrişî bîyî giranêr. Kokimêko 83 serre bi zorî rayîrî ra şino la zîndan de tepişîyeno.''

Ceylanî derheqê tecrîdkerdişê Rayberê Şarê Kurdî Abdullah Ocalanî û astengîyanê çareserîya meseleya kurdan de vat: ''Hêzê mîyanneteweyî nêwazenê meseleya kurdan çareser biba. Coka şexsê Birêz Ocalanî de kurdî yenê tecrîdkerdene. Seba ke meseleya kurdan bi haştîyane çareser biba ganî Birêz Ocalan azad bibo. Tepişteyan seba rewşa xo ya sîyasîye dest pê grevê vêşanîye kerd. Ganî rayaumûmîya demokratîke bi xurtî paştî bida tepişteyan. Grevê vêşanîye ra nata tedayê vera tepişteyan zêdîyayî.

Serra 2019î de sîyaset û rêxistinanê komelê sivîlî bi qîmî mesuldarîye nêgirewte xo ser û bare bi temamî kewte milê tepişteyan. Netîce de 9 merdimî merdî. Zîndanan ra cenazayî vejîyayî. Eke ma mesuldarîya xo bîyardêne ca ma eşkayêne verê nê şehadetan bigêrê. Semedo ke rewşa winasêne reyna nêqewimîya ganî ma cewab bidê prosesî.''