Hemşaredara Sûrî ya Amedî Gulane Fatma Onkol prosesê weçînayîşan û çimdarîyê xo yê verênî ANFyî rê ercnayî.

Gulane ard ziwan ke înan şarî reyde prosesê weçînayîşan de bi seferberî karî kerdê û vat: ''Ma roja weçînayîşan de wayîrê rayanê xo vejîyê û Sûro ke 8 serrî yo destê qeyûmî de bi, apey girewt. Roja weçînayîşan de serebûtê xirabî qewimîtayî. Vervatoxê ma yê warî û wezîfedarê ma embaz Emîn bi hawayêkê barbarî ame qetilkerdene. Pêkewtişan bi saetan dewam kerd. Ma serkewtişê xo yê Sûrî dîyarîya embaz Emîn Çelîkî kenê.''

Gulane da zanayene ke mazbata erey dîyaya înan û vat: ''Ma dî ke mîyanê çend rojanê peyênan de qeyûmî xîret kerdo ke kasaya şaredarîye xalî bikero. Nika karê ma yê cigêrayîşan dewam kenê. Heyf ke 4ê nîsane de zî bi mîlyonêk TLyî wesayîtêk cayêkî rê ameyo kirakerdene. Şaredarîye xeylêk cayan rê zî deyndar a.''

Gulane pare kerd ke Sûr qezayêka taybet a û vat: ''Sûrî meymandarîya ziwan, bawerî û tarîxanê cîyayan kerda. Ma do wayîrê nê taybetmendîyanê Sûrî vejîyê. Heyf ke qeza vurîyaya cayê fuhuş û koçberîye. Ma do vera madeyanê tîryakî û fuhuşî seba pawitişê doman û ciwanan bixebitê. Ma do pêro meseleyan bi mesuldarî çareser bikerê. Sûr do bibo qezaya cinî, ciwan, doman û astengdaran. Ma seba Sûrî îdareyêkê herindar ci ra û herêmîyî awan bikerê.''