Çekdar Kato yan zî Nacî Temel serra 1982î de Şirnex de dadîya xo ra beno. Çekdar keyeyêkê welatperwerî de beno pîl û serra 2000î de verê xo dano koyanê azadan. Çekdar mîyanê embazanê xo de zî pê embazîya xo ya bêsînore û kedkarîya xo ya bêhesabe ameyêne şinasnayene.

Embazanê Çekdarî ra Şafak Yekbûnî wina qala Çekdar Katoyî kerdêne: ''Embaz Çekdar mana dayêne her çi coka hem şer de hem zî cuye de lez aver şi. Karkerdiş seba ey meseleyêke nêbi. Verê embazanê xo de zî zaf zerrînizm bi. ''

Arnaos Herekolî zî vat: ''Wexto ke embaz Çekdar vatêne Kobra yeno yan zî operasyon do bibo mîyanê des deqayan de vateyê ci raşt bîyêne. Embaz Çekdarî warê asayîşî de zaf hîşyar bi û warê leşkerîyî de zî zaf hîsger bi. Her tim vatêne eşkera nîyo ke dişmen key bêro.''

Fermandarê HPGyî Çekdar Anterî derheqê nê şehîdê Têgêrayîşê Azadîye de wina vat: ''Embaz Çekdar zaf baldar bi. Tim vera kêmasîyan lez bi. Ma Kato Jîrka de pîya bîyî. O çax dekewtişê şaristanan zehmet bi. Ma plan kerd ke çar embazî şorê uca. Embaz Çekdarî zaf waştêne şoro na çalakîye. Embazî şinê keşf kenê, embaz Çekdar û embazêko bîn zî do hêriş bikerê. Dişmen înan vîneno û dano guleyan ver. Wird embazî zî birîndar benê. Embaz Çekdar payê xo rqa birîndar beno. Seba ke weş nêkewo destê dişmenî serê xo de bomba teqneno.''

Fermandaranê HPGyî ra Rûbar Qamişloyî zî vat: ''Çalakbîyayîşê embaz Çekdarî balkêş bi. Her tim bicoş bi. Kede ra hes kerdêne û girêdayîyê kede bi. Çîyo ke embazanê ci nêdîyêne Çekdarî dîyêne. Senî ciwîya o qayde zî şehîd bi. Embaz Çekdar Elkê de birîndar bi, seba ke nêkewo destê dişmenî serê xo de bomba teqnaye. Seba ma pêroyînan şinasnayîşê Çekdarî mesajêko manadar bi.''