Partîya Demokratîke ya Kurîdstanî (PDK) ya ke binê komûtaya keyeyê Barzanî de ya 24 serrî verê cu bi tankanê Saddamî Hewlêr îşxal kerd. Tarîxo ke şarê Başûrê Kurdîstanî sey Xayînîya 31ê Tebaxe name keno,  PDK parlamentoyo ke şarî 50 serran de bi têkoşîn û seyan şehîdan rona, kerd qerarqehê Saddamî.

Wextê şerê kendawe de vakurê paralelî yê 30.  teyerayan rê ame qedexekerdene.  1992 de YNK, PDK û Partîya Komînîste ya Kurdîstanî zî tede cepheyê Kurdîstanî Hewlêr rejîmê Baasî ra pak kerd. La peyra mabênê nê cepheyî de pêrodayîşê îqtîdarî  dest pêkerd û nê zî welat ant miyanê şerê zerî ke sey birakujî yeno îfadekerdene. Pêkewtişanê mabênê PDK û YNKyî heta 1994-1996 dewam kerd. semedê vindarnayîşê pêkewtişan mabênê PKD û YNKyî 1995 de bi mabençîya Amerîka paytextê Îrlanda Dublin de pêvînayîşî ameyî kerdene la pêkewtişî nêameyî vindarnayene.

1996 de serkeşîya Ahmet Çelebî de muxalîfanê Iraqî semedê wardayîşê Saddam Huseynî pîya bi CIA planêk ser o xebityayî la Amerî ka hema semedê  naye amede nêbî. Rayberê YNKyî Celal Talabanî zî paştî dayêne nê planî. Amerîka amade nêbo zî nêeşkayêne nê planî ra dûrî vindero. Nê mabên de pêkewtişanê PDK û YNKyî dewam kerdêne. Aşma tebaxe de Celal Talabanî Çemçemal û Hewlêrî ra vera Kerkukî operasyon da destpêkerdene.

Serekê Pêroyî yê PDKyî Mesud Barzanî 22ê tebaxe de Saddam Huseyînî rê mektubêk nuşt û davet kerd ke wa Hewlêr îşxal bikero. Barzanî yo ke mektub de qetilkarê 182 hezar kurdan Saddamî rê vatêne 'serekê mi' û ci ra rîca kerdenê ke wa vera Celal Talabanî artêşa Iraqî bîyaro Hewlêr. Çend rojî dima ra Barzanî rayîrê Baxdadî girewtî.  Goreyê pêkedişî Artêşa Iraqî seba ke bikewo Hewlêr hetkarîya Barzanî kena û Barzanî zî Başûrê Kurdîstanî de muxalîfan tepişen û dano Saddamî. Badê pêkerdişî 31ê tebaxe de artêşa Iraqî Musul û Kerkukî ra bi 150 tankan û 30 hezar leşkeran kewte Hewlêr.

Dekewtişê bajarî de pêkewtişî nêqewimîyayî. Hêzanê PDKyî rayîrê Giwêrî yê Hewlêrî de 13 pêşmergeyê YNKyî ke tepiştî dayî guleyan ver. Dima ra taxa Ankawa û tay cayan de pêkewtişî vejîyayî. Doneyê hûmara merde û birîndar tam mero zaneyene zî yeno vatene ke 450 kesî merdî 200 kesî birîndar bîyî. Artêşa Iraqî aşmêke Hewlêr û dormeyê ci de vera muxalîfan operasyonê tepiştişî domna. Badê na xayînîye YNK Hewlêrî ra ancîya la hêrişê PDK û artêşa Iraqî dewam kerdêne. 9ê êlule de YNK Silêmanî ra mecbur mend ke binancîyo Rojhelatê Kurdîstanî. YNK aşmêke ra dima bi paştdayîşê artêşa Îranî reyna Silêmanî girewt û heta nizdê Hewlêrî ame. Narey zî Koyê Şeglawa û Ranya hetê teyarayanê tirkî a ameyî pirodayene. Badê pêkewtişan sînorê PDKyî sey 'herêma çeqere' û yê YNKzî sey 'herêma hewze' bewlî bîyî.
 

Barzanî şewa 31ê tebaxe de kombîyayîşêk de vano înan semedê girwetişê Hewlêrî rejîmê Baasî dir îtîfaq kerd û bajar Celalîyan ra pak kerdo.  Serekê Parlamentoyê PDKyî Cewher Namik Selîm naye sey xayînîye name keno û nêrazîbîyayîş ramojneno. Barzanî badê 31ê tebaxe kombîyayîşê çapemenîye de wina vano: Ma kurdê, ma iraqijê. Beno ke mabênê ma Iraq de tay problemî estbê la nuqtaya ma ya hempare pawitişê Iraqî yo.

Verê 31ê tebaxe Silêmanî, Hewlêr,qismêkê Helebçe, Ranya, Qeladizê, herêma Qendîlî Pencwîn û xeylê herêmê bînî yê Başûrê Kurdîstanî destê YNKyî de bî.  Destê PKDyî de têna Duhok, Zaxo, Soran û qismêkê Halebçe estbi.  Goreyê doneyan se ra 30 herra Başûrî destê PDKyî de bî. Badê 31ê tebaxe zêdîya û bi se ra 60. Vîjnayîşê 1992 de PDK se ra 44 rey girewtî la 31ê tebaxe ra dima no bi se ra 71. Nê doneyî hemkarîya PDKyî ramojenê. Hemkarîya PDKyî ya vera partîyanê kurdan sere de dewleta tirke bi hêzanê herême dewam kena.