Muditê Pêroyî yê Weşîye yê Silêmanî Sabah Hewramî bi eşkerayîya çapemenîye da eşnawitene ke Silêmanî de des vakayê kolera ameyî tesbîtkerdene. Wezîrîya Weşîye ya Iraqî zî da zanayene ke Muthana de di û Kerkuk yew vakayê kolera ameyî tesbîtkerdene.

Teberê nê vakayan de herêma Silêmanî de 56 kesî bi şikê kolera laboratûvarê merkezî yê Bexdadî yenê kontrolkerdene. Dr. Hewramî vat şeş rojanê peyênan de nêweşxaneyanê Silêmanî de nizdê çar hezar vakayê emel û viritişî ameyî tesbîtkerdene.  Dr. Hewremî kolera sey nêweşîya zaf xirabe name kerd û vat la tedawîya ci zaf rehet o. 2012î ra nata Silêmanî de newe vakayê kolera vejîyenê werte. Iraq de zî tewr peynî 2015 de kolera amebî vînayene. Nêweşîya kolera zafane herênanê ke tede awe kêmî û xirabina ya de vejîyena werte.