Silêmanî, Kerkûk û Qendîlî de rojbîyayîşo 75in ê Rayberê Şarê Kurdî Abdullah Ocalanî ame fîrazkerdene.

Silêmanî de Têgêrayîşê Cinîyan ê Azadan ê Kurdîstanî (RJAK) bi wesîleya serra 75ine ya Ocalanî 75 leyî ronayî. Dima RJAKî eşkerayîyêke daye û pare kerd ke ê do bi fikranê Rayberê Şarê Kurdî vera hişmendîya faşîste têkoşîn bikerê. Aktîvîte bi deyîranê Koma Rojava qedîyaye.

Kerkûk de serkêşîya Komeleya Ciwananê Welatperweran ê Kurdîstanî de 75 leyî ronîyayî. Endamê Komele Helmet Germîyanîyî tîya de pare kerd ke rojbîyayîşê Ocalanî seba kurdan mijdanîya cuya azade ya. Aktîvîte bi slogananê sey “Bijî Serok Apo”, “Jin, Jiyan, Azadî” û “Bê Serok jiyan nabe” qedîyaye.

Dewa Bokrîskanî ya Binarê Qendîlî de serkêşîya Meclîsê Şarî de leyî ameyî ronayene. Endama Meclîsê Şarî Ronahîye Hisên aktîvîte de îfade kerd ke Abdullah Ocalan bi fikranê xo rayberîya dinya keno. Ronahîye venga pêro kesan da ke seba caardişê azadîya Ocalanî waran debikerê.