Serra 1994î de polîtîkaya şerî ya dewleta tirke ra bi seyan dewê Kurdîstanî ameyî vêşnayene û vengkerdene. Nînan ra yew zî dewa Mîrelîyan a Farqînî ya. Binê her vaşê na dewe de tarîx nimite yo.

Dewe de verî asûrî, sûryanî û armenîyî ciwîyayêne. Heta di serrî verî binê erdî ra eserê armenîyan ameyî vetene. Wextê Qirkerdişê Armenîyan de dewe de armenîyî ameyî qetilkerdene û êyê ke weş mendî şîyî Amed. Serra 1994î de zî dewe semedo ke qoricîtîye qebul nêkerda ameye vêşnayene û vengkerdene.

Dewe de hemwelatîyê bi nameyê Seyfettîn Gunbatanî ma pêşwazî kerdî û ma dewe de çarnayî. Gunbatanî ma rê kuçe, patîka û  girê ke asûrîyan pê destê xo viraştê mojnayî û da zanayene ke dewe wextê Qirkerdişê Armenîyan de armenîyî nimitî la di keyeyî dewlete de hemkarîye kerde û armenîyî dayî destê dewlete.

Gunbatanî vat: ''Qirkerdişî ra 3 keyeyî weş mendî, ê zî bîyî misilman. Nika dewe de 700 kesî 100 keyeyî estê. Çimeyê debara ma zîret û heywankarîye la ma armenîyan ra asinkerîye zî musayê. Tîya de erdê asûrîyan zî zaf bi la şarî pêro dest na ser. Tîya de Newalê Çelebîyan û Serkanîya estê. La dormeyê ma de HES û awbendî virazîyayî. Coka her ca bîyo ziwa. Pîsîya fabrîkaya tutunî şina çemanê ma. No û dermanê zîretî masêyan kişenê.''