Xoverdayîşê grevê vêşanîye yê ke seba wedaritişê tecrîdê serê Rayberê Şarê Kurdî Abdullah Ocalanî bi serkêşîya Leyla Guvene ameybî destpêkerdene dewam kenê.  7'ê Adare de parlamenterê HDP'yî Tayyîp Temel û Mûrat Sarisaçî zî dest bi grevê vêşanîye yê bêdem-bêagêrayîşî kerd. Rixmê zext û zordarîyan de parlamenterê HDP'yî Dersîm Dage, Tayyîp Temel û Mûrat Sarisaç çalakîya xo domnenê, parlamenterê HDP'yî yê ke ameyê destbendkerdene zî nezaret de grevê xo domnenê.

Parlamenterê HDP'yî Temelî derheqê xoverdayîşê grevê vêşanîye, zextan û destbendkerdişan de ANF'yî rê qisey kerd.  Temelî ard vîrî ke Kurdistan de xeylî dewrê tarîxkîyî ameyê ciwîyayene û ard ziwan ke no dewr zî dewrêko tarîxkî û krîtîk o.  Temelî vat ke xoverdayoxê ke grevê vêşanîye yê bêdem-bêagêrayîşî de yê qedera welatî bewlî kenê û vat çalakîyê şorişgêrî yê sey grevê vêşanîye zî prosesanê muhîm û krîtîkan de vejênê werte.

Temelî xoverdayîşê grevê vêşanîye yê ke serra 1982 de virazîyayî zî ardî vîrî û vat, "Serra 1982 de Zîndanê Amedî de Xeyrî û Kemalan dest bi grevê vêşanîye kerd.  Ê wextan îmkanî çinbî û şaro Kurd tehlukeyê merg û çinbîyayîşî dir têrî mendibi. Tirkîya prosesêkê tarîyî ra ravêrtêne. Şertanê wina giranan de Zîndanê Amedî de kesê ke bedenê înan roje bi roje helîyayêne cimatî rê bîyî roşnayî. Na çalakîya tarîxkîye bîye newe ra ganebîyayîşê cimatî û mucadeleyî. Proseso nikayên zî zaf maneno dewrê 1982'î. Xora çalakîyê grevê vêşanîye zî dewranê wina krîtîkan de kewenê dewre.

TÎFAQÊ FAŞÎSTÎ HEMVERÊ KURDAN DE ŞER ÎLAN KERD

Temelî ard ziwan ke tîfaqo faşîst yê AKP-MHP'yî bi plananê zext û çinkerdişî wazeno ke bi Kurdan çok bido ronayene, nê tîfaqî bi hawayêkê eşkerayî hemverê Kurdan de şer îlan kerdo û vat, "Çarçewaya na polîtîkaya şerî de AKP-MHP wazeno ke bi hezaran Kurdî bêrê kiştene, bêrê tepiştene û koç bikerê. No planê şerî nika dewre de yo. Ewro, Vakûr, Başûr, Rojawan û Rojakewtene tehluke de yê. Erdogan, kuçe bi kuçe gêreno û vano Kurdî do nê welatî ra şirê. Welato ke qalê ci keno zî Kurdistan o, yanî ware û wetenê Kurdan o.

Erdogan bi na polîtîkaye Kurdan ser o koçberîye ferz keno. Waştişê çalakwananê xoverdayoxanê grevê vêşanîye waştişê meşrû yê, ganî tavilî tecrîdo ke serê Rayberê Şarê Kurdî Abdullah Ocalanî de yeno bicaardene bêro wedaritene. Gama ke Îmrali de tecrîd keweno dewre hemverê hemeyê Tirkîya de tecrîd yeno bicaardene. Bi tecrîdî, qirkerdiş, destbendkerdiş, tepiştiş û zulm keweno dewre."

Temelo ke derheqê amacê çalakîya grevê vêşanîye de qisey kerd dewam de nê vatî: "1'ê Adare de hemeyê tepişteyan, 3'ê Adare de embaza ma ya parlamentere Dersîm Dage, endamê HDP'yî Salîh Cansever, Îsmet Yildiz, Sevîcan Yaşare, Salîh Tekîn û Bîlal Ozgezerî seba wedaritişê tecrîdî banê HDP'yî yê bajarê Amedî de dest bi grevê vêşanîye yê bêdem-bêagêrayîşî kerd. 7'ê Adare de min, embazê min o parlamenter Mûrat Sarisaçî û pîya bi embazêkê HDP'yîyî dest bi xoverdayîşî kerd.   Ma xoverdayoxanê ke bedenê înan roje bi roje helêno rê bibê veng, bi nê hawayî wa vernîya mergan bêro girewtene. No gureyêko exlaqî û huqûqî yo."

DO ABLÛKAYA FAŞÎZMÎ BÊRO ŞIKITENE

Temelî hemverê sereştişê polîsan ê serê banê Amedî de reaksîyon da û vat, "Vizêr bi hezaran polîsî û kesê ke rîyê înan girewte yo bi sîlehanê giranan eştî serê banê ma yê bajarî. Înan berî şikitî, hemverê parlamenter û çalakwanan de sîlehê xo kerdî berz. Bi seyan hemwelatijî seba paştdayîşî ameyî la rastê hêrişanê polîsan ameyî. Se beno wa bibo do no xoverdayîş dewam bikero, xoverdayîşê embazanê ma yê ke nezaret de yê dewam keno. Ez û 3 embazê parlamenterî zî banê bajarê Amedî de xoverdayîşê xo domnenê. Ez veng dana her kesî ke veng bidê vengê xoverdayoxan. Amacê nê xoverdayîşî qedînayîşê bêhuqûqîya Îmrali ya. Îmrali de sûcê huqûqî yeno kerdene. Ganî birêz Ocalan bieşko avûkat, keye û wasîyê xo reyde pêvînayîş virazo. Dewlete fikranê birêz Ocalanî ra tersena. Têkilîya Ocalanî ya bi cimatî hezm nêkena û naye ra tecrîdî hîna kena xorî, hêrişê şarî kena."

Temelî ard ziwan ke seba ke înan teber de rolê xo kay nêkerdo tepişteyî hemverê faşîzmî de kewtê dewre û qiseykerdişê xo wina qedîna: "Seba ke ma teber de hemverê faşîzmî de gureyo ke keweno ma doşan ser ma bica nêard embazê ma yê ke zîndanan de bîyî kewtî dewre û bedenê xo dayî mergî ser. Zîndanan tim ablûkaya faşîzmî şikita û ewro zî do ablûkaya faşîzmî bişikîyo. Sey her dewrî tepişteyan rolê xo yê tarîxkîyî kay kerd. No hemverê cimato ke mesuldarîya xo bica nêano rê vengdayîşêk o. No seba sîyasetkaran, nûştoxan, roşinvîran, hunermendan û hemeyê merdimîye qîrayîş û vengdayîşêk o. No vengdayîş maneno xoverdayîşê Hayrî, Kemal û Mazlûman."