Dimayo ke HDP'yî qerar da ke 3 rojan tewrê xebatanê meclîsî mebe û meclîs boykot bike,  bi beşdarîya Hemserekanê HDP, KCD, HDK'yî û pêroyê parlamenteran Ofîsê Amedî de çalakîyêk viraşte.

HDP'yî vizêr qerar girewt ke 3 rojan tewrê xebata meclîsî mebe û 3 rojan meclîs boykot bike. Dimayê nê qerarî, ewro beşdarîya Hemserekê Pêroyî yê HDP'yî Sezaî Temellî, Hemserekê  Pêroyî  yê KCD'yî Leyla Guven û Berdan Ozturkî, Hemvervatoxa HDK'yî Gulîstan Kiliç Koçyîgîte û pêroyê parlamenteran reyde verba tayînkerdişê qeyûman Ofîsê Amedî de çalakîye viraşte.

Çalakîye de polîsan dormeyê rayîranê Plaza AZC'yî girewt. Hemserekî, parlamenterî û îdarekarî saete 12:00 de bi sloganan ameyî Kuçeya Hunerî. Polîsan nêverda ke ê şerî Plaza AZC û eşkerayîye bidê. Qefle zî verba polîsan vindert û şîyo verê Plaza AZC û eşkerayîye tîya de ameye kerdene.

Hemserekê Pêroyî yê HDP'yî Temellîyî qisey kerd û vat; "Ma do binê nê dormegirewtişan de nêciwîyê, ma do înan bişiknê. No şaristan şaristanê ma yo. Ma qerar girewt ke 3 rojan tewrê xebata meclîsî mebê. Wexto ke hukmat qeyûman tayîn keno, bêvengîya meclîsî nêna qebulkerdene. Qeyûm zulm û teda yo, sîstemê faşîzmî yo. Ma bêveng nêmanenê, şarê Kurdî paşt dano ma. Ma wazenê ke embazê ma abigêrê serê wezîfeyanê xo. Bi şerêko ke dişmenîya Kurdan rê ame sazkerdene, wazenê payan ser bimanê. Ewro şero ke Sûrîye de ame sazkerdene, xîretê îşxalkarîye yo, dîplomasîya gemarina ke Sûrîye de kenê dişmenîya Kurdan ra ber çîyêk nîya. Na dişmenîye Amed de bi qeyûman, Rojawan de bi zulm, qirkerdiş û îşxalkarîye yena mojnayene."

Temellîyî vat ê do çîyo ke destkewteyanê Rojawanî û destkewteyanê Kurdan nêpaweno, qebul nêkerê û va  "Ganî çareserîya nê meseleyî bi muxataban rê bêra qiseykerdene. Muxatabê nê meseleyî bêguman Ocalan o. Ganî ma masaya çareserîye bivejîyê meydan. Seba çareserîyêka demokratîke û destûrêko demokratîk."