Tepişteyanê dewaya PKK û PAJKî grevê xo yê vêşanîye 4ê nîsane de kiriştbi safhaya diyîne. Tepişteyê grevê vêşanîye tewrê pêvînayîşan nêbenê û mehkemeyan boykot kenê.

Tepişteyê Zîndanê Marmara Abdulsettar Ozerî derheqê çalakîya grevê vêşanîye de ANFyî rê qisey kerd.

Ozerî dîyar kerd ke safhaya destpêke ya çalakîya înan de armanc hişyarkerdiş bibi û safhaya diyîne de ê armanc kenê ke merdimê demokratîk û welatperwerî hîna zaf mesuldarîyanê xo bîyarê ca.

Ozerî erjê demokratîkî û estbîyayîşê şarê kurdî sey sebebê polîtîkayanê hêrişî yê Îmraliyî mojnayî û vat: ''Şexsê Rayber Apoyî de vera erjanê komelê demokratîkî û estbîyayîşê şarê kurdî hêrişî yenê kerdene. Eke vera ney nêrazîbîyayîş nêro mojnayene no seba ma qelsîyêke beno. Ma bi bawer ê ke safhaya hîrêyîne de şarê xo û hêzanê demokratîkan reyde ma do çalakîya xo ser bivisnê.''

Ozerî îfade kerd ke metodê înan o newe yê grevê vêşanîye xotecrîdkerdiş nîyo; xoresnayîşê raştîya têkoşîn, şehîdan û Rayberîye yo. Ozerî vat: ''Ma seba xo sey şensî vînenê ke sey Rayber Apoyî ciwîyenê, hîs û fikranê ey de benê hempar. Bêguman ganî komel wayîrê ney vejîyo. Şarê ma Newroze de û weçînayîşanê herêmîyan de cewabêko xurt da faşîzmê dewleta tirke. No tewir tewirêko girîng bi û hêz da ma.''