Aysele Daglar 2018ine de Muş de netîceyê îxbarêkî de ameye destbendkerdene û tepiştene. Derheqê Aysele de bi îdiayê ‘xirakerdişê yewîya dewlete’ û ‘endamîya rêxistine’ di rey cezaya muebeda girane dîyaye.

Aysele Daglar semedê parçeyê şarapnelî yê sereyê aye de bi tehlukeyê felcî dir rî bi rî ya. Aysele zîndanê Wanî de tepişte ya û nêna dermankerdene. Rewşa Aysele her ke şina giran bena û lazimîya xo zî bi hetkarîya embazanê xo kena. Perdeyê goşê Aysele îşkenceyî de teqyabi û lingê aye de zî deriznayîş esto.

Dayîka aye Emîne Daglar ard ziwan ke semedê janî ra a nêeşka şora pêvînayîşê kênaya xo û mengêke ra nata zî pêvînayîşê telefonî nêkerd.

Dayîke Emîne da zanayene ke 5 hewte yo ê nêeşkenê pêvînayîşê telefonî bikerê û vat: "No hewte newe yo ma qisey kerd. Ma nêzanenê çira ma nêgêrena. Ez venga Wezaretê Edaletî dana ke çi cezaya kênaya mi esta, wa keye de bianca. Ez rewşa kênaya xo ra biguman a. Îmkanê mi çin o ke ez şêra kênaya xo bivîna. Bi di serrî yo ez janî ra nêeşkena şêra verê kênaya xo."

Emîne qiseykerdişê xo wina qedîna: "Kênaya mi nêweş a, lingê aye, çimê aye dejenê. Nêweşîya kênaya mi giran a û nêverdenê şêro nêweşxane zî. Lingê aye de derznayîş esto. Wexto ke ameye tepiştene îşkence ra perdeyê goşê aye teqîya. Kênaya mi nêeşkena rayîr a şora. Benê doktor vanê, 'şore ma nêeşkenê çîyêk bikerê.' Kênaya mi nêeşkena lazimîya xo bi ca bîyara. Eke derman  nêba felç manena. Ez verî wazena wa kênaya mi bêra dermankerdene.''