Pîran Herkîyo ke tepişteyanê Behdînanî ra yo û çimdaro sîyasî û pêşmergeyêk o. Herkîyî ANFyî rê qalê zîndananê PDKyî kerd.

Herkîyî da zanayene ke o serrêke û di mengî Zîndanê Hewlêrî de tepişîyayo û vat: ''Ez bi neheqî tepişîyaya. PDKyî 2020 de dest pê tepiştişê çalakîker, rojnameger û sîyasetmedaran kerd. PDK seba ke bertîl, bêusûlî û dizdîyê ci nêvejîyê werte rojnamegeran keno hedef. Yew tehamulê PDKyî bi vengê azadîye çin o. La PDK se bikero zî do nêeşko vengê azadîye yê zîndanan bibirno.''

Herkîyî bale ante kerdişanê xiraban ê zîndananê PDKyî ser û vat: ''Eke çewî mi rê bivatêne ke Kurdîstan de zîndanêko winayên est o mi pê bawer nêkerdêne. Zîndanê Hewlêrî de 12 metre de 150 kesî tepişîyayêne. Xora naye ra rewşa ma ya psîkolojîke xira bîyayêne. Cayo ke tepişteyanê Behdînanî tede nan werdêne cara 65 santîmetre bi. Mîyanê Zîndanê Hewlêrî de qetîyen kitab yan zî çimeyêkê xeberan çin bi. TV est bi la tede teyna kanalê şênayîye est bîyî.''

Herkîyî peynîya qiseykerdişê xo de qala muameleya mehkeme kerd û vat: ''Ma hewte reyî vejîyayî verê mehkeme, dewaya ma bênetîce mende. Her çiqas ma rê cezayî zî dîyabî dadgerî nêeşkayî ma ser o birêke bidê û ma bêveng bikerê.''