Ethem Karagozo ke Zîndanê Kiriklarî yê Îzmîrî de tepişîyayêne 30 serran ra dima 19ê çeleyî de zîndanî ra vejîya.

Karagoz (50) wareyê xo Amed de bi coşî ame pêşwazîkerdene. Keyeyê ey, îdarekaranê DBP, DEM Partî, Hemsereka MED TUHAD-FED Emîne Kaya û endamanê TUAY-DERî Meydanê Teyarayan ê Amedî de Karagoz bi çepik û tîlîlîyan pêşwazî kerd.

Ethem Karagozî tîya de vat: ''Ez zîndanî ra vejîyaya la embazê mi mendî. Coka parçeyêkê mi uca de mendo. Rojê ke ma pîya tede azad bibê, nêzdî yê. Wexto ke ê zî azad bibê, ma pêro do azad bibê.''

Qiseykerdişî ra dima Karagoz keyeyê xo reyde şi Bismilî.