Panc rojnameger û aktîvîstê ke hetê mehkemeya Hewlêrî ra cezaya zîndanî ya 6 serran dîyaye ci, 41 rojî yo grevê vêşanîye de yê. Destûr nêdîyeno ke şeş kesî avûkatanê xo bivînê.
16ê sibate de Mehkemeya Ceza ya Hewlêrî aktîvîstêk û panc rojnamegeranê behdînanijan ê bi nameyê Şêrwan Şêrwanî, Umêd Seîd, Guhdar Zêbarî, Eyaz Kerem û Harîwan Îsayî rê cezaya zîndanî ya 6 serran dabî. Hem Başûrê Kurdîstanî de hem zî warê mîyanneteweyî de xeylêk kesan vera ceza nêrazîbîyayîşê xo mojna.
Tepişteyan vera cezaya zîndanî 17ê sibate de dest pê grevê vêşanîye kerd.
Avûkatanê behdînanijan ra Beşdar Hesenî derheqê rewşa înan de Rojnewsî rê qisey kerd û da zanayene ke rewşa tepişteyan xirab a. Hesenî pare kerd ke asayîşê zîndanî nêverdeno tepişteyî keye û avûkatanê xo bivînê û têna di reyî pê telefonî qisey kerd. Avûkatan vera astengkerdişê pêvînayîşî nêrazîbîyayîşê xo mojna.
Nê şeş kesî wextê protestoyanê Başûrê Kurdîstanî de tepişîyayî ke protestoyî semedê krîzê ekonomîk û nêdayîşê meaşaran ra ameyêne kerdene.
