Nobeta Edaletî ya ke Amed de seba veradayîşê tepişteyanê ke înfazê înan ameyê vêşnayene û ê nêweşan, vizêr roja 200. temam kerde. Bi wesîleya roja 200. ya Nobeta Edaletî dezgehê keyeyan û merdimanê tepişteyan MEBYA-DER, MED TUHAD FED, TUAY-DER, Têgêrayîşê Cinîyan ê Azadan, DBP û HDP, Komeleya Huqûqnasan a Seba Azadîye, Komeleya Cigêrayîşî ya Kultur û Ziwananê Mezoptamya (MED-DER), Komeleya Heqanê Merdiman (ÎHD) zî tede bi beşdarîya xeylêk dezgeh, komele û rêxistinan Parka Koşuyoluyî ya Amedî de eşkerayîye ameye wendene.

Nameyê merdim û keyeyanê tepişteyan ser o Încîye Guler eşkerayîye wende. Gulere îfade kerd ke ê têna wazenê ke wa tepişteyê ke înfazê înan ameyê vêşnayene û tepişteyê nêweşî bêrê veradayene. Gulere vat: ''Tepişteyî têna nîyê.''

Hemsereka OHDyî ya Amedî Ozume Vurgun pare kerd ke ê tedaya polîsan a vera Nobeta Edaletî ya Îstanbulî şermezar kenê û vat: ''Ma do tim hetê têkoşeran de bibê, serkewtiş ê xoverdayoxan o.''

Îdarekarê TUAY-DERî Firat Taşkinî vat: ''Eke waştişê keyeyan biameyêne caardene 18 cenazayî zîndanî ra do nêvejîyayêne.''

Îdarekarê ÎHDyî yê Amedî Yusuf Erdoganî vat: ''Zîndan de 657ê ci giran hezar û 517 tepişteyê nêweşî est ê. ÎHD hetê tepişteyan û têkoşînê înan de yo.''

Temsîlkarê TÎHVî Murat Abayî vat: ''Tepişteyî binê îşkenceyî de yê. Ganî tepişteyê nêweşî cade bêrê veradayene.''

Endamê Heyetê Rayberdişî yê Baroyê Amedî Mehdî Ozdemîrî vat: ''Wa heqê cuye bêro pawitene, tepişteyê nêweş û tepişteyê ke înfazê înan ameyê vêşnayene bêrê veradayene.''

Hemserekê HDPyî yê Amedî Zeyyat Ceylanî vat: ''Eke komel bi hawayêkê xurtî vengê xo vejo tepişteyî do vera bidîyê. Ganî ma bibê parçeyêkê nobete û vengê dadîyan berz bikerê.''

Tewr peyêne kênaya tepişte Abdullah Kirtayî, Herdeme Merwanî da zanayene ke înan partîyan û rêxistinanê komelê sivîlî de Anqara de pêvînayîş kerdo, înan soz da ke hetê keyeyan de bibê la sozê xo nêardo ca. Herdeme vat: ''Ez venga pêro partîyan dana ke ma eşkenê pîya na mesele çareser bikerê.''

Çalakîye bi sloganan qedîyaye.