Taxa Rehîma ya Kerkûkî de dima ke PDK, Cepheyê Turkmenan û selefîyanê Baasî pêkerd tay koman rayîrê Hewlêr-Kerkûkî qefilna. 2yê êlule de kurdan seba rayîr abibo çalakîye kerde. La hêzanê Iraqî hêrişê înan kerd, 2 ciwanî qetil kerdî û 11 kesî zî birîndar kerdî.

Tevgera Azadî derheqê serebûtan de eşkerayîyêka nuştekîye daye û vat: ''Ganî verê serebûtan pê rayîrê haştîyaneyî bêro girewtene. Nêbo şaristan de şero etnîk û mezhebî do biqewimîyo. Eke verê serebûtan nêro girewtene felaketêko pîl do biqewimîyo.

Kerkûk sey verî do pê metodanê leşkerî û dîktatorîye nêro îdarekerdene. Ganî şarê Kerkûkî qederê xo ser o bire bidê. Hêzê peyê nê çalakîyan derheqê weçînayîşanê verê ma de wayîrê armancan ê û kenê ke pê kayanê lêşinan wayûbiratîya şaranê Kerkûkî qûrban bikerê.

Ma venga pêro şaranê Kerkûkî danê ke bi hîsgerî nêzdîyê serebûtan bibê, bi metodanê haştîye meseleyan çareser bikerê.''