Torra Ziwan û Kulturê Kurdî seba pawitiş û averberdişê ziwanê kurdkî venga partîyanê sîyasîyan ê kurdan da ke ziwanê xo yê sîyasetî bikerê kurdkî û şarê kurdan ra waşt ke hîna zêde wayîrê ziwanê xo bivejîyo.
Komxebata Torra Ziwan û Kulturî ya Yewîne qezaya Sûrî ya Amedî de 11-12ê çeleyî de ameye kerdene.
Komxebate 2 rojan dewam kerd û netîceyê ci bi eşkerayîyêka çapemenîye ame eşkerakerdene.
Eşkerayîye Otêla Demîrî ya qezaya Sûrî de hetê Endamê Heyetê Îdareyî yê Torre Bawer Berşevî ra ameye wendene.
Eşkerayîya wina ya:
"Polîtîkayanê asîmîlasyonî yê ke bi serran o bi hawayêkê sîstematîkî yenê kerdene tehlûkeyê vera ziwan û kulturê kurdan zêdêr kerdî. Seba vergirewtişê nê polîtîkayan xebatî yenê kerdene la ganî vurnayîşê na rewşe hîna zêde xîret bêro kerdene.
Komxebata diyîne de waştişê beşdaran ser o nameyê torre ame vurnayene û name sey Torra Ziwan û Kulturê Kurdî ameye weçînayene. Reyna statû û logoyê Torre zî ame hîrakerdene û îdare û sekreteryaya Torre ameyî weçînayene. Torre xo rê kerd armanc ke biresa pêro hetanê cîyayan û coka Torra Ziwan û Kulturê Kurdî hetê beşdaran ra ameye newekerdene.
Komxebate de ame parekerdene ke seba averberdiş û pawitişê ziwan û kulturê kurdan ganî serra 2020î biba serra Baba Tahîrê Hemedanî û seferberîya seba kurdkî gamê bitesîrî bêrê eştene. Naye ra zî bira serûberkerdişê konferans, sempozyum, komxebate û kombîyayîşê ziwan û kulturê kurdan û paştdayîşê dezgeh û sazgehan ame girewtene. Na çarçewe de 8ê adare, 21ê adare û 21ê sibate, 15ê gûlane û rojanê taybetan de bira caardişê xebatan ameye girewtene.
Nika ra pey xebatê pawitişî û averberdişê kultur û ziwanî do bi hîşmendîyêka sîvîle û demokratîke, bi vîr û bawerîyêka xurtêre bêrê kerdene. Ma se y Torra Ziwan û Kulturê Kurdî venga pêro dezgehan û sazgehanê sivîlan danê ziwanê xo yê sîyasetî bivurnê bikerê kurdkî û xebatanê xo bi kurdkî bikerê û paştî bidê xîretanê pawitiş û averberdişê ziwan û kulturê kurdî. Ma venga şarê xo zî danê ke wayîrê ziwanê xo bivejîye û hêz bide xîretanê pawitiş û averberdişê ziwanê kurdkî.
Komxebate de ma xîret kerd ke pêro kedkarî û xemwerê ziwan û kulturê kurdî pîya kom bikerê, mabênê înan de rayîrêkê bazarîye abikerê û seba dej û meseleyanê ziwan û kulturê kurdî rayîranê çareserîye peyda bikerê. Beşdarbîyayîşê 300 kesan seba ma û seba ziwan û kulturê ma destkewteyêko pîl o. Seba beşdarbîyayîş û bihêzkerdişê Torre ma pêro beşdaran rê zaf sipas kenê û ma hêvî kenê ke komxebata ma ya yewîne ya Torra Ziwan û Kulturê Kurdî biba wesîleya pawitiş û averberdişê ziwan û kulturê kurdî."
