Fevzîye Başarana ke Êlih de ciwîyena û kurdkî ra ber ziwanêk nêzanena, Turk Telekomî ra waşt ke xeta ci ya telefonî biqefilno. Dayîke Fevzîye bi rayîrê açarnayoxî derdê xo vat la nê zî qîm nêkerd. Temsîlkarê Turk Telekomî dayîke ra waşt ke îlakîm ya tirkî yan zî erebkî qisey bikera û xeta aye nêqefilnaye.

Lajê dayîke Omer Başarano ke Îstanbul de ciwîyeno 20ê tebaxe de seba ke xeta dadîya ci bêra qefilnayene  Turk Telekomî rê telefon kerd la Turk Telekomî da zanayene ke wa dadîye înan reyde têkilîye rona. 21ê tebaxe de Omer Başaranî dezayê xo erşawit hetê dadîya xo.

Omer Başaranî vat: ''Dezayê mi tirkî çita vat dadîya mi zî tekrar kerd. La temsîlkarê Turk Telekomî îdîa kerd ke dadîya mi bi îradeyê xo qisey nêkena û waştişê ci red kerd.''

Başaranî rewşe hesabê xo yê medyaya komelkî de pare kerde û bi hezaran kesan paştî daye ci.

Omer Başaranî vat: ''Wexto ke mi Turk Telekomî rê vat ke dadîya mi tirkî nêzanena mi rê vat 'Ziwanê dayîke yê Tirkîya tirkî ya. Ma tirkî qisey kenê û bi tirkî yewbînan fam kenê.' Mi ci rê vat çira şima de erebkî esta la kurdkî çin a. Înan mi rê vat ke dadîya mi eşkena erebkî qisey bikera la înan de kurdkî yew prosedur çin o.''

Başaranî vera Turk Telekomî nêrazîbîyayîşê xo mojna û vat: ''Tirkîya de 3 mîlyon erebî estê û 30 mîlyon kurdî estê. Dadîya mi 65 serre ya û tirkî nêzanena. Çira Turk Telekom nêeşkeno seba kurdkî açarnayox bigêro kar?''

Başaranî da zanayene ke dima ke medyaya komelkîye de vera babete nêrazîbîyayîşî zêdîyayî Turk Telekomî ci ra uzrê xo waşt. Başaranî vat: ''Mi înan rê vat eke reyna merdimê ke tirkî nêzanayêne bigêrê ê do se bikerê. Înan zî mi rê vat beno ke wina yew prosedur amade bikerê. La mi pê bawer nêkerd. Çend wextî ra nata kurdkî çin a, naye ra ber senî do biba?'