Endama Komîteya Rayberdişî ya PKKyî Hêlîne Umît Medya Haber TVyî de rojdem ercna.

Qiseykerdişê Hêlîne Umît ra tay noqtayê girîngî wina yê:

''4ê nîsane rojbîyayîşê Rayberê Şarê Kurdî Abdullah Ocalanî bi têkoşînê vera tecrîdî derbaz bi. 4ê Nîsane yeno manaya Rojbîyayîşê Azadî. Cinî, ciwan û pêro şarê kurdî azadîya Rayber Apoyî wazenê. Seba ney zî dostanê ma Hemleya Azadîye ya 10ê Teşrîna Verêne dabî destpêkerdene. Şarê kurdî seba azadîya Rayber Apoyî eşkeno her bedelî bido. Emser 4ê Nîsane de têkoşînê seba azadîya Rayberîye resa lewe. Ganî heta ke sîstemê Îmraliyî bêro parçekerdene û Rayber Apo azad bibo no têkoşîn dewam bikero.

Merkezê Pawitişê Şarî (MPŞ) Newroze de mijdanîya xo daye û îlan kerd ke hinî hêzê gerîlayan pê droneyanê çekdaran eşkenê. Xora qet yew teknîk û teknolojî hêzê merdiman ra hîna aver nîyo. Ewro têgêrayîşê bînî bi heyranîye ewnîyenê ma ra. Gerîlayî hêvîyê pêro bindestan ê. Mijdanîya MPŞyî sayê kedanê şehîdan ra vejîyaya werte. Dewleta tirke tim vera ma bi teknolojîya tewr xurte şer kerd la ma zî tim vera ney xo verda û îmkanî viraştî. A raşte artêşa tirke destpêkî ra nata vera gerîlayan bin kewtbî. Çunke nêeşkena şer bikera. Nika na mijdanîye do xeylêk çîyan zî bivurna. La oyo esas îradeyê merdiman o.

Newroza 2024î bi hawayêkê heybetînî qewimîyaye. Şarê kurdî vera polîtîkayanê AKP-MHPyî Newroze de tewirê xo mojna. Na Newroze de şar hîna zaf wayîrê Rayber Apoyî vejîya. 

Îqtîdarê AKP-MHPyî weçînayîşan de bin kewt û ma no çi zanayêne. A raşte no îqtîdar verî ra vera têgêrayîşê azadîye bin kewtêne. Ma bi taybetî 10 serran ra nata vera AKP-MHPyî têkoşînêkê aktîfî kenê. Weçînayîşanê 31ê adare de xeta xoverdayîşî ya kurdan û hêzanê demokratîkan eşkera bîye. Mexlûbê 31ê Adare faşîzmê AKP-MHPyî bin kewt. AKPyî bi hemkarîya MHPyî cara xo qedîna.

Netîceyanê weçînayîşan her kes şoq kerd. Îqtîdarî hêverî Wan de hêrişê îradeyê kurdan kerd. Eke îqtîdar Wan de ser bikewtêne Amed û Mêrdîn de zî do îradeyê şarî xesp bikerdêne. La şarê Wanî rayîr nêda ney. Şarê Wanî demokrasîyê Tirkîya zî xelisna. Beno ke îqtîdar ancî polîtîkaya qeyûman biceribno. AKP xîret keno ke Vakur, Başûr û Rojawan de şerê vera kurdan gir bikero. La Planê Çokdayîşî yê îqtîdarî weçînayîşan de pûç bi.

Tirkîya hewceyê hêzanê demokrasîyî yê raştikênan a. A raşte DEM Partî her çiqas Kurdîstan de tabloyêko rind vistbi destî zî Tirkîya de netîceyê ci weş nêbîyî. Eşkera yo şarê Tirkîya vurîyayîşî wazenê. Coka înan narey herinda AKPyî de CHP tercîh kerd. 

Ganî xoverdayîşê Wanî hol bêro famkerdene û ercnayene. Xoverdayîş Kurdîstan zî kerd rin. Ciwananê kurdan nê xoverdayîşî rê serkêşîye kerde. Ez pêro ciwanan bi na wesîle selam kena. Ameyox, estbîyayîş û destkewteyanê Kurdîstanî ciwanan rê emanet ê. Coka ciwanî ganî heta peynî xo ver bidê. Ganî ciwanî xoverdayîşê xo hîna radîkal bikerê. Wa ciwan û cinîyê kurdî xo rêxistin bikerê û xopawitişî bîyarê ca. Eke ciwanê ma nêrê teslîmgirewtene Kurdîstan zî do nêro teslîmgirewtene. Heyf ke dewlete kena ke bi polîtîkayanê şerê taybetî îradeyê ciwananê ma teslîm bigêra. Ganî ciwanê ma çewî ra çîyêk nêpawê û bi xo bipawê.

Ma prosesêkê vurîyayîş û vurnayîşî de yê. Nika verê ma de Roja Karkeran 1ê Gulane est a. Ganî 1ê Gulane bi temamî biba roja yewîya kedkar, karker, bindest û enternasyonelan. Eke ma pîya têkoşîn bikerê eşkenê îqtîdarê AKP-MHPyî bin bivisnê.''