Kovara Hawarî tarîxê xebatanê kurdkîyan de rolêko taybet kay kerd. 15ê gulana 1932î de Şam de rayberîya Celadet Elî Bedîrxan û embazanê ci Kamûran Bedirxan, Qedrîcan, Osman Sebrî, Cigerxwîn û Nureddîn Zazayî de tarîxê xebetanê kurdkîyan de rîpelêko newe ame akerdene. Her çiqas Kovara Hawarî pê herfanê erebkîyan dest pê weşanî kerd zî dima pê birêka radîkale herfê latîbî xebitnayî.

Hawara Kurdan

Kovara Hawarî 1932î ra heta 1943î 11 serran weşanîyaye û 57 hûmaran ra ameyêne meydan, 23 hûmarayî pê herfanê erebkîyan, ê bînî zî pê herfanê latînkîyan ameyî nuştene. Hûmara yewine ya Hawarî 15ê gulana 1932î de vejîyaye û heta 15ê tebaxa 1943î dewam kerd. Kovare paytextê Sûrîye Şam de ameyêne çapkerdene. Kovara Hawarî kovara polîtîke û edebîyatî bîye û hetê Celadet Elî Bedirxanî ra ameyêne vetene. Kovara Hawarî ya ke tarîxê weşangerîya kurdkî de cayê ci girîng o, seba ziwanê kurdkî hetkarîyêka pîle kerde. Kovare de bi giranî cigêrayî, hîkaye û şîîrê kurdkî, edebîyatê kurdkî ra tay nuşteyî weşanîyayî.

'Hawar vengê zanistî yo'

Celadet Elî Bedirxan hûmara verêne ya kovare de wina vano: ''Hawar vengê zanistî yo. Zanayîş xonaskerdiş o. Xonaskerdiş zî ma rê rayîrê xelisîyayîşî û weşîye akeno. Her keso ke xo nas keno, eşkeno xo bido naskerdene. Hawarê ma her çî ra verî estbîyayîşê ziwanî do bido naskerdene. Çunke ziwan şertê estbîyayîşî yo verên o.''

Kovara Hawarî de nuşteyê erebkî û fransizkî zî zaf estbî. Hûmaranê verênan ê kovare de têna nuşteyê Celadet û Kamuran Bedirxanî estbî.

Roşanê Ziwanê Kurdkî

No tardîsyon o ke pê Kovara Hawarî vejîya meydan ewro zî seba kurdkî zaf girîng o. Serra 2006î de roja ronayîşê Kovara Hawarî (15ê Gulane) sey Roşanê Ziwanê Kurdkî ameye qebulkerdene. Na roje her serre pêro Kurdîstan de yena fîrazkerdene.