Hemsereka Egitim-Senî ya Amedî Salîha Zorlu derheqê polîtîkayanê asîmîlasyonî û şerê taybetî de ANFyî rê qisey kerd.

Salîha ard ziwan ke meseleya kurdan ronîyayîşê Komara Tirkîya ra nata dewam kena û vat: ''Asta polîtîkayanê asîmîlasyon û înkarî ra meseleya kurdan hînî teyna meseleya zereyê Tirkîya nîya meseleyêka Rojhelatê Mîyanênî. Bi taybetî Darbeya 12ê Êlule ra dima polîtîkayanê neolîberal û asayîşî ra vera kurdan tedayî bîyî giranêr.''

Salîha dîyar kerd ke qedexekerdişê ziwanê kurdî rewşêka newîye nîyo vat: ''Polîtîkayanê şerê taybetî ra aya tewr dîyarkere û tûje binpaykerdişê heqê perwerdeyê bi ziwanê dayîke û mîyanê umûmîye de qiseykerdişê bi kurdkî yo. Çinhesibnayîşê nasname, ziwan û kulturê şarêkî çinhesibnayîşê ê şarî yo. Vera şarê kurdî polîtîkaya helînayîşê nasnameyî yena kerdene. Ganî ziwanê dayîke sey ziwanê perwerdeyî tewrê tedeyîya perwerdeyî bêro kerdene, sey dersa weçînite ney. 

Nêbeno ke ziwan û nasnameyê şarêkî çin hesibîyê. Seba awankerdişê cuya bi nasname û ziwanê şaran ganî meseleya kurdan bêra çareserkerdene. Meseleya kurdan na ya. Ganî şert û mercî seba perwerdeyê bi ziwanê dayîke bêrê afernayene. Seba çareserîya meseleya kurdan wa game bierzîya.''