Dima ke Hemşaredara Qezaya Pirsûsî ya Riha Hatîce Çevîk ameye destbendkerdene, polîsan dormeyê bînaya şaredarîye girewt û destûr nêdanê ke kesêk nêzdîyê bina bibo. Cigêrayîşê binaya şaredarîye dewam keno.

Parlamentera Partîya Demokratîke ya  Şaran (HDP) ya Riha Ayşe Surucu waşt ke endamanê partîye reyde şorê bînaya şaredarîye. La polîsan Surucuye û endamê partîye derb kerdî û ê bînaya şaredarîye ra dûrî girewtî. Çalakîya roniştişî ra dima zaf hemwelatî zî meydanî de kom bîyî. Surucu vist vîrî  ke înan se ra 59,36 rayî girewtî û şaredarîye heq kerde û vat labelê îqtîdar bi qeyûman xîret keno ke nê heqê înan bigêro. Surucu vat: "Ewro zulm kenê. Hemşaredara ma bi hawayêkê bêhuqûqî destbend kerde. Na dizdîye, talan û destsernayîş a. Eke şima qeyûm tayîn kenê çira weçînayîşan kenê? Şima nêeşkenê îradeyê Pirsûsî xesp bikê. Şima do qet nêeşkê ser bikewê. No şar do vera naye vindero."