Vera tebersînorkerdişê aktîvîstê kurdî Mehmet Çakasî Almanya de çalakîyî dewam kenê. Çalakîya ewroyî verê Zîndanê Uelzenî de ameye kerdene. Çalakwanan vat Çakas têna nîyo û ê do destûr nêdê şawitişê ci.
Aktîvîsto kurd Mehmet Çakaso çewlîgij o ke kanûna 2022î bi waştişê meqamanê almanan Îtalya de ame tepiştene, adara 2023yî de Almanya rê ame îadekerdene. Nîsana 2024î de Mehkemeya Eyaletî ya Berze ya Celle bi îdîaya ''endamîya PKKyî'' cezaya 2 serran 10 mengan daye ci. Nika Zîndanê Uelzenî yê Saksonyaya Cêrîne de yeno tepiştene û yeno plankerdene 4ê teşrîna verên a 2025î de bêro tehlîyekerdene.
Muracatê îltîcaya Çakasî hetê Buroyê Multecîyan û Koçî yê Federalî (BAMF) ra ameye redkerdene. Mehkemeya Îdareyî ya Luneburgî muracatê vera tebersînorkerdişî bê erjnayîşî red kerd. Serdozgerîye zî înfazê cezaya hepsî peyde ant û verê prosesê tebersînorkerdişê Tirkîya akerd.
Bi vengdayîşê AZADÎ e.V. û KON-MEDî 4ê hezîrane ra nata bajaranê cîya cîyayan de çalakîyê protestoyî û eşkerayîyê çapemenî yenê kerdene.
Ewro verê Zîndanê Uelzenî de ke Mehmet Çakas tede yeno tepiştene, çalakîye ameye kerdene. Çalakîye de ame vatene ke Çakas bîlasebeb ame muhakemekerdene û eke bişawîyo Tirkîya do newera bêro tepiştene raştê zextî bêro. Kurdan veng da ke wa Almanya poltîkaya krîmînalîzekerdişê kurdan caverdo.
Çalakîye de sloganê sey “Biji berxwedana zindanan”, “Freiheit für alle politische Gefangene” û “Hoch die internationale Solidarität” ameyî vatene.
Semedê Mehmet Çakasî 12ê temmuze roja şemeyî saete 14:00 de do Îstasyonê Trenan ê Merkezî yê Hannoverî de rayraşîyayîşêko gird do bêro kerdene.
