Wan de verê cû keyeyan de, verê her berî de kîlîmî rakerde bîyî. Bazaranê şaristanî de zî hînî kîlîmê Îranî roşîyenê. Wan de hînî berardişê kîlîmî qedîyeno, hostayê neweyî zî nênê weyekerdene. Esnafê kîlîman bale ancenê kêmîyayîşê rotişan ser û qerqilîyenê. 

Esnaf Murat Demîrî îfade kerd ke şaristan de sey verî çew kîlîman nêvirazeno û vat: ''Verê cû her kes keye de kîlîmî viraştêne. La nika la û malzemeyê kîlîman zaf vay ê. Çew nêeşkeno kîlîman virazo. Hînî her kes kîlîmê Îranî gêno. Ez 20 serran ra nata esnafê kîlîman a. La parî ra nata karê ma hol nêşino. Wextê janî de zî rotişî se ra 90 kewtî. Xora hînî turîstî zî nênê ke kîlîman bihêrînê. Înşalah berî abenê û turîzm reyna dest pêkeno. Viraştişê kîlîman tay zor û zehmet o. Gereka çew sebir bikero. Çew de o sebr nêmend.''