Platformê Ziwanê Kurdkî raporê 'Tirkîya de Derheqê Kurdkî de Rewşa Huqûqî'' bi eşkerayîyêka çapemenîye Cemîyetê Rojnamegeran de da zanayene.

Rapor hetê Vervatoxê Platformî Şerefxan Cizîrîyî ra ame wendene. Cizîrîyî vist vîrî ke Darbeya 12ê Êlule ra dima Tirkîya vera ziwananê bînan tewirêko xedar û qedexeker mojna û bi rayîrê qanûnan ziwanê bînî qedexe kerdî.

Cizîrîyî bale ante ser ke serranê peyênan de nêzdîbîyayîşê vera kurdkî nerm ê la bi qanûnan nênê pawitene. Cizîrîyî vat: ''Coka vera kurdkî hema zî hêrişî, cîyakerî estê. Kurdkî yena peygoşkerdene, seeke çin a yena hesibnayene. Ziwan û nasnameyî heqê merdimîye yê. Heqê merdiman o ke bi ziwanê xo perwerde bivînê, ziwanê xo aver berê.

Ma sey platformî wayîrê bingeyêkê hîrayî yê. Şarê kurdî paştî dano ma. Ma warê mîyanneteweyî ra zî paştdayîş pawenê.''

Platformî waşt ke kurdkî biba ziwano fermî û Dezgehê Ziwanê Kurdkî bêro awankerdene.