Walîyê Mûşî yê verênî Îlker Gunduzozî dewijanê Pazûyî rê vato ke ''Karnameyê şima baş nîyo, şima rê xizmet do nêro kerdene.''

Rayîrê Pazûyî bi serran o nêro kerdene. Dewe de cayê weşîye, kanalîzasyon û şebekeya awe çin ê û ceyran zî tim birîyeno.

Dewijan ard ziwan ke înan xo resnayo walîyê verênî Gunduzozî la walîyî înan rê vato ke ''Karnameyê şima baş nîyo, şima rê xizmet do nêro kerdene.''

Seba ke dewijî bi nasnameyê xo yê welatperwerîye şinasîyenê û wird weçînayîşanê gulane de zî raye daye HDP/Partîya Çep a Keske walîyî dewijî dekerdî 'lîsteya reşe.'

Dewijî vanê ke wextê dawet û şînan de seba ke rayîrî qefilîyaye yê çew nêeşkeno bêro dewe.

Wekîla Partîya Çep a Keske ya Mûşî Sumeyye Boz dewe zîyaret kerde û meseleyê dewijan goşdarî kerdî. Boze ard ziwan ke ê do gamanê hewceyan bierzê, meseleyan Meclîs de bikerê rojdem.