Erdlerz de ke 25ê hezîrane Wan de qewimîya, xeylêk kesî mexdûr bîyî. Erdlerz de rixm ke kesêk/e nêmerd/e zerarêko pîl resa mal û keyeyê roniştoxan. Herêma erdlerzî de tehlukeyo tewr pîl vîrusê Korona yo. Weşîya kokim û domanan ser o rîskêko pîl esto.

Erdlerzî ra dima heyetê HDPyî di rojan mexdûrê erdlerzî zîyaret kerdî û derdê înan goştaritî. Polîs û leşkeranê tirka seba ke heyetê HDPyî xo nêresno dewijan xeylêk astengîye kerde, qereqolê Qerqelî û Serayî de çar cayan de nasnameyî persayî û heyetî ra persa ke hetê înan de paketê hetkarîye estê yan nê.

Hemserekê HDPyî yê Wanî Okkeş Kawayî ard ziwan ke hema hema zerar resayo pêro keyeyan. Kawayî îfade kerd ke ê gêrayî AFAD û dezgehanê bînan û seba hetkarîye xebere daye înan la qet yew hewcedarîya mexdûran nêameye peydakerdene, nika zî mexdûrê erdlerzî teber de manenê. Kawayî vat polîsan mabênê Seray û Qerqelî de 17 km de 4 reyî ê vindarnayî û seba paketa hetkarîye cigêrayîş kerd. 

Wekîla HDPyî ya Wanî Muazzeze Orhan zî vat hema zî hemwelatîyan rê xeyme nêerşawîyaye. Muazzeze Orhan bale ante ser ke nê prosesê janî de malzemeyê hîjyenî hetê mexdûran de çin o û vat: ''Rîskêko cidî esto ke vîrus vila bibo. Ganî Wan sey herêma felaketî bêra îlankerdene. Qeyûmî dewijan reyde dest pê bazarîya TOKÎ kerd ke no nêame qebulkerdene.''