Wan de qewimîyayîşê îşkenceyî yo bîn
Qezaya Erdîşî yê Wanî de 2 kesî ke hetê cendirmeyan ra ameyî tepiştene ci rê îşkence ame kerdene.
Qezaya Erdîşî yê Wanî de 2 kesî ke hetê cendirmeyan ra ameyî tepiştene ci rê îşkence ame kerdene.
AKP’yî weçînayîşî ra ver teda û zordarîya xo hîna avêr berd û Erdîş de keno ke şarî bi îşkence û tedayî bitersno. Bitaybetî zî no demo peyên de polîsan û leşkeran eşt xeylî keyeyan ser û bi seyan kesî tepiştî.
Erdîş de nê 22 rojanê peyênan de 90 kesî ameyî tepiştene û 47 kesî zî ameyî tewqîfkerdene. 2 menganê peyênan de polîs û leşkeran eşt bi 200 keyeyan ser. Reyna nê rojanê peyênan de îşkence zî yeno rojdem. Naye ra ver zî 3 domanî rastê îşkenceyî ameyîbî û tepişîyayîbî.
CIWANAN RÊ 4 ROJÎ ÎŞKENCE AMEYO KERDENE
Hewteyê verî leşkeran Erdîş de eştbî dewa Papişkine ser. Bî eşkera ke leşkeran ciwanan rê 4 rojî îşkence kerdo. Nê di ciwanan ra Înan Dîlmaç 19 serre, Bulent Saklar zî 18 serrî yo. Îşkenceyî ver laşê ciwanan bîyo qîr-kewe û îşkenceyî ra dima zî ameyî tepiştene.
LEŞKERAN YEW HEWTEYO KE DORMEYÊ DEWE GIREWTO
Qaso ke xebere ameya girewtene, leşkeran yew hewteyo ke dormeyê dewa Papişkine girewto. Reyna goreyê xeberan leşkerî ge-ge rayîrê dewe ser vindenê û ge-ge zî zereyê dewe de dewrîya gêrenê. Weçînayîşê serra 2014’î de DBP na dewe de 100 reyî girewtê. AKP dewe ra qet reyan nêgêna û naye ra zî nê rojanê peyênan ê ver bi weçînayîşî de, AKP keno ke şarî bitersno. Reyna qaso ke yeno vatene, Fermandarê Qereqolê Erdişî leşkeran ra vato: “Şima çira uca de nêkiştê û tepişte arde tîya.“