Wan de serra peyêne de serebûtê sey serranê 1990an qewimîyenê. Çapemenîye de zî ame weşanayene ke wesayîtê pê markaya Land Roverî nêmê şewe de şinê dewan û şarî rê gef wanenê. Dima dîmenê sereştişê keyeyan û îşkenceyî weşanîyayî. Wekîlê HDPyî yê Wanî Murat Sarisacî menga sibate de pare kerd ke wesayîtêko bêplaka ey teqîb keno û dîmenî pare kerdî. Endama Meclîsê HDPyî rê zî hetê polîsan ra gef amebi wendene ke ya Wan biterikna yan zî bêra tepiştene.

Vizêr zî dewa Belecûkî ya Rojhelatê Kurdîstanî ra Bahrem Yûsefî dewa Yamanyurdî ya Sarayî de ame kiştene. Serebûtê ke serra peyêne de Wan de qewimîyenê persê ''Gelo hêzê tarî newe ra kewtî dewre'' ano aqilê çewî. Hemserekê HDPyî yê Wanî Okkeş Kavayî û wekîla HDPyî ya Wanî Muazzeze Orhan ANFyî rê qisey kerd.

Kavayî îfade kerd ke dinya vera vîrusê Korona têkoşîn kena la dewleta tirke vera HDPyî seferber bîye û vat: ''Nê hêrişî bêmabên dewam kenê. Vera xebatkaranê ma bi desan operasyonî yenê kerdene, embazê ma yenê tepiştene. Roja ma pê operasyonî dest pêkerd, 43 embazê ma nezaret de yê. Wextê nezaretî yeno dergkerdene. Dewlete bi israr wazena ke HDP krîmînalîze bikerê. Wextê peyênî de îşkence û înfazî zêdîyayî. Têgêrayîşê serranê 90an esto.''

Wekîla HDPyî ya Wanî Muazzeze Orhan zî da zanayene ke serebûtê remnayîşî rewşêka newe nîya û vat: ''Hêzê nêkifşî yê ke xo rê vanê polîs şar remnenê û înan rê gef wanenê. Wazenê partîya ma krîmînalîze bikerê. Nê serebûtî manenê serebûtanê 90an. Hema zî Mayê Haştîye gêrênê domananê xo. Weçînayîşê 7ê hezîrane ra dima Serekwezîrê ê çaxî Davutogluyî vatbi ke 'Torosê sipî vîr a mekerê. Startê nê wextî o çax amebi dayene. Dima Tahîr Elçî amebi kiştene. Bombayî ameyî teqnayene, gefê 'ya rey bide mi ya zî bimirê' hema zî dewam kenê. Tay serebûtê remnayîşî zî qewimîyenê ke haya ma tira çin a. Bi taybetî embazê ma yê cinîyî yenê weçînayene ke nê hêrişî vera têkoşînê cinîyan ê.''