Wan de ke sînorê Îranî û Tirkîya de yo, trajedîya multecîyan nêqedîyena. Bi seyan multecîyê ke Rojhelatê Mîyanênî û Asya ra şerî ra warê xo teriknenê, xîret kenê ke sînorî ra derbaz bibê û xo biresnê Wan. Semedê serdê zimistanî ra, koyanê zoran û polîtîkayanê Îran û Tirkîya yê vera multecîyan ra bi desan multecîyî nê menganê peyênan de sînorî de cemidîyayîşî ra merdî.

Serra 2019î de 37 multecîyî Wan de cemidîyayîşî ra merdî. Par zî 13 multecîyî qezaya Ebexî ya wanî de wexto ke xîret kerd ke sînorî ra derbaz bibê merdî. Na trajedîya multecîyan nêqedîyaye. Rîyê qezayê mînîbusa bazirgananê merdiman ra 17 kesî merdî û 50 kesî zî birîndar bîyî.

Serekê Şubeyê Wanî yê Komeleya Heqanê Merdiman (ÎHD) Murat Meletî ard ziwan ke hêvîya multecîyan zaf reyî sînor de qedîyenê. Bi taybetî şerê Rojhelatê Mîyanênî bi semedê multecîtîye. Meletî îfade kerd ke şert û mercanê hewayî rê sînorê Tirkîya-Îranî û tebdîrê xurtî yê asayîşî benê semedê mergê merdiman.

Meletî da zanayene ke 3 serr ê ke bi seyan merdimî sînorê Îranî û Tirkîya de cemidîyayîşî ra merdî û vat: ''Cenazayê nê merdimî wexto ke vewre şina eşkera benê. Multecîtîye suc nîya. La no suc o ke merdim bi hawayêkê xirabî nêzdîyê multecîyan bibo.  Ez venga welatan danê ke bi berpirsîyarîya xo têbigêrê. Heqanê multecîyan rê hûrmet bimojnê. Heqê cuye fîraz o.''