Xîretê Darbeya 15ê Temmuza 2016î ra nata Colemêrg û Wan de Rewşa Îstîsnayîye (OHAL) yena caardene. 7 serrî yo wird şaristanan de zî qedexeyî serdest ê.

Colemêrg de polîtîkayê şerê taybetî, binpaykerdişê heqan û azadîye yenê kerdene. Her kuçeyê şaristanî de noqtayê kontrolî est ê û her girî ser de qereqol û kalekolê neweyî virazîyayî.Merkezê Colemêrgî binê ablûqaya wesayîtanê zirxînan de yo. Dima ke qeyûm tayînê şaredarîye ame kerdene zî qedexe vilayê dewan û wareyan zî ame kerdene. Seba ke wareyî û baxçeyî dekewtiş û vejîyayîşan rê qedexe yê şar nêeşkeno heywankarîye û zîretî bikero. Berê sînorî yê Gever, Şemzînan û Çelê zî ameyî qedexekerdene. Îqtîdarê AKP-MHPyî bi nê hawayî şar keno xizan û dano koçkerdene.

Mabênê Wan-Colemêrg û qezayanê Gever, Şemzînan û Çelê de bi desan qereqol û kalekolê neweyî virazîyayî. Noqtayan de şar bi saetan yeno vindarnayene, destbendkerdene û raştê heqaretan yeno. Nê 7 serranê peyênan de 15 kesê sivîlî hetê wesayîtanê zirxînan û guleyanê leşkeran ra ameyî qetilkerdene. Sereştişan û nezaretan de zî îşkence û tedayî zêdîyayî.

Wan zî sey Colemêrgî tim hedefê îqtîdarê AKP-MHPyî de yo. Dewleta tirke 7 serrî yo vera qeyûman tayînê Wanî kena û pêro aktîvîte û çalakîyan bi hawayêkê sîstematîkî qedexe kena. Qeyûmanê Wanî pêro mal û mulkê şaredarîye rotî û şaredarîye de hemwelatîyê şaristananê Tirkîya sey karkerî ameyî cakerdene.  Wan de çalakî û aktîvîteyê AKP, MHP û Huda Parî serbest ê la çalakî û aktîvîteyê rêxistinanê komelê sivîlî, HEDEP û DBPyî qedexe yê.

Tewr peyên 12ê teşrîna verêne de polîsan hêrişê çalakîya seba Rojawanî kerd û bi îşkenceyî xeylêk kesî destbend kerdî. 2016 de Erdîş de polîs û leşkeran Hedîye Ataman vêşnaye û qetil kerde. Ceza nêdîyaye nê polîs û leşkera la mêrdeyê Hedîye Ahmet Ataman tepişîya.

Wan û qezayanê ci de bi seyan bendê neweyî, qeleqol û kalekolê neweyî est ê. Mabênê Wan û Rojhelatê Kurdîstanî de zî dês û xendekî ameyî viraştene.