Mudirîya Pêroyî ya Karanê Petrol û Madenî ya Wezaretê Çimeyan ê Tebîîyan û Enerjî ya Tirkîya warê girîngî yê Wan û Colemêrgî sey warê madenî îlan kerdî. Komeleyanê xoza û temsîlkaranê partîyan ê sîyasîn îfade kerd ke ê do vera naye wurzê ra.

Rejîmê AKPyî nika zî dest eşt Golanê Cîlo Satî, Koyê Govendê Zozanê Nebirnavî û dewanê Korgan û Kotranîsî yê Colemêrgî. Bi destê wezaretî nê cayî benê warê madenî.

Nê herêman de zereyê şikefteyan de textan estê. Cîlo û Sat de zî kraterî estê. Bi bahaneya madenî do bi hezaran darî birîyenê, awe bêra herimnayene, heywankarî û zîret bêrê çinkerdene û merdimî bi zorî bêrê koçkerdene. Nê herêman de bi hezaran heywanê sey xezal, pezkovî, lûye zî estê.

Sey Colemêrgî qezayanê Miks, Şax û Tûşba yê Wanî de zî tay werê girîngî sey warê madenî ameyî îlankerdene. Daristananê nê herêman de tewir bi tewir heywan û nebatê endemîkî estê. Çirê herême zî seba heywankarî û zîretî çimeyê verênî yê hemwelatîyan ê. 

Aktîvîstê xoza Fatîh Şahînî pare kerd ke eke şar û rêxistinê komelê sivîlî pîya têbigêrê eşkenê verê nê talanî bigêrê. Şahînî vat: ''Bi rayîrê madenî çimeyê tebîîyî yenê çinkerdene. No nêno qebulkerdene. Ganî şar na babete de hîşyar bo. Ganî ma bi hawayêkê rêxistinkerdeyî têbigêrê.

Serekê Komeleya Xoza ya Wanî (ÇEV-DER) Alî Kalçikî zî derheqê mesele de wina qisey kerd: ''Qestî ra barbarîye kenê. Waranê winasênan de nêbeno ke madenî bivirazîyê.Têna roniştoxê herême nê ganî her kes vera naye tewirê xo bimojnê.''

Hemserekê HDPyî yê Geverî Abdulkerîm Akdoganî zî ard ziwan ke ê do sey HDPyî seba ke madenî nêrê viraştene xîret bikerê. Akdoganî vat: ''Na herême merkezê waretî ya. Her kes debarê xo wina keno.  Madenê winasênî benê sebebê nêrazîbîyayîşê şarî. Ma do vera nê karê madenî wurzê payan ser.'